Naix a plataforma “Esfendemos as Luengas”

A plataforma presenta un video denunciando o papel d'os meyos de comunicación cuanto a la realidat trilingüe aragonesa

logoIste miercols se presentó publicament a plataforma “Esfendemos as luengas“, naixida ta “continar creyando espacios t’a espardidura de l’aragonés y o catalán, antimás de denunciar as continas enrestidas que sufren istas luengas minoritarias por parti d’as institucions publicas, organizacions socials y politicas u d’os meyos de comunicación”, seguntes han declarau os suyos promotors.

A plataforma refusa, como no podría estar d’atra traza, a lei de no luengas, aprebada iste pasau 9 de mayo, y sinyalan que ista modificación lechislativa no ye que “unatro intento d’acabar con una realidat  lingüistica, d’a qual organismos como a UNESCO han exichiu a protección y divulgación d’istas luengas.”

En ista primer presentación t’o mundo han quiesto denunciar tamién“As continas manipulacions y adoctrinamiento en toponimia u denominacions d’as luengas, as declaracions amagadas, as risalletas u o desconoixmiento scientifico” que dicen “son una constant en os meyos, exposicions u declaracions institucionals“

A suya primer acción ye estada a prochección y espardidura d’un video a on que denuncian l’actitut d’os meyos de comunicación aragoneses, destacando o papel d’a televisión publica Aragón TV que “plega a ridiculizar istas luengas, mesmo arribando a negar a existencia d’o catalán y l’aragonés.” En o video contimparán o tractamiento dau a las luengas en os meyos aragoneses contimparando-lo, más que más, con atras televisión publicas de Catalunya u o País Vasco.

A presentación de “Esfendemos as Luengas” remató con un clamamiento a la sociedat ta que se treballe por a oficialidat d’aragonés y catalán y que se “remate con ista persecución institucional y mediatica de totz os que charramos istas luengas.”

 

Una rispuesta a Naix a plataforma “Esfendemos as Luengas”

  1. Jibo cuantas plataformas y manifiestos por as nuestras luengas! Cuan prencipiaremos a gastar más tiempo en treballar directament por as luengas y no en fer ista mena de cosas que no plegan ni en as casas nuestras?

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.