Naixe una nueva canal de difusión y promoción audiovisual d’Aragón

A pachina web www.film.aragon.es naixe con a intención d'espardir y informar sobre o sector audiovisual aragonés

Foto: Gubierno d'Aragón

Foto: Gubierno d’Aragón

Una nueva canal de difusión audiovisual naixe d’Aragón. Se tracta d’a pachina web www.film.aragon.es. L’obchectivo d’iste espacio ye fer-se una ferramienta referent de difusión y información t’o sector audiovisual aragonés, amás d’estar una vía ta amanar o cine t’o ciudadano. Ahiere estió presentada por o director de Cultura d’o Gubierno d’Aragón, Humberto Vadillo, que estió acompanyau por José Antonio Aguilar, director d’o Festival SCIFE, y o realizador aragonés Ignacio Estaregui.

A web ye ordinada en diferents espacios. Un d’os mas destacaus ye o catalogo dichital film.ar. Un prochecto que naixe dende a Dirección Cheneral de Cultura d’o Gubierno d’Aragón ta fer-se un vehíclo ta promocionar o treballo feito por realizadors y directors de curtometraches aragoneses entre os festivals nacionals y internacionals.

Iste catalogo s’irá formando por curtometraches que previament se trigarán por medio de convocatoria publica. Iste catalogo s’enguera con quatro curtos: “Mi papa es director de cine” de Germán Roda, “Reveal” d’Ignacio Estaregui, “Walkie Talkie“, de Rubén Pérez, y “Vamos, Bonita” de Lorena Hernández.

Istas obras estioron eslechidas d’entre as 15 cintas que se presentoron a la primera convocatoria d’o programa. A traviés d’iste sistema online, de visionau limitau a programadors y distribuidors de festivals de cine, vidio y televisión s’espardirán y se presentarán as obras audiovisuals aragonesas a os diferents festivals nacionals y internacionals. Istas obras ya s’han ninviau por os medios convencionals de difusión –a traviés de DVD– y han estau presents en 763 festivals, estando-ne seleccionaus en 55. Han obteniu 6 premios.

Una vidioteca con sinyatura aragonesa

Un d’os apartaus mas destacaus d’a pachina web ye destinau a la creyación d’una vidioteca d’autors aragoneses. Parte con un centenar de vidios d’os realizadors aragoneses que dende 2005 han estau seleccionaus t’o Premio Los Olvidados d’a Semana d’o Cine y a Imachen de Fuents d’Ebro (SCIFE). Iste fondo, d’acceso libre, s’incrementará anyalment con os 10 curtos seleccionaus en dito Premio.

Asinas mesmo iste espacio online cuenta con un directorio profesional. D’ista forma, as interpresas, tecnicos, directors, actors u actrices podrán disposar d’un espacio de trobada y promoción.

Antiparte, a pachina presenta apartaus adedicaus a la información. Os intresaus podrán obtener información de forma actualizada sobre tot lo relacionau con as aduyas europeas y estatals a la creyación audiovisual, os prochectos de coproducción internacionals, concursos de curtometraches y documentals, asinas como información sobre os festivals, muestras u certamens en Aragón.

Fuent: http://www.cronicadearagon.es/wordpress/?p=44216

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.