Napolitano, reeslechiu president d’Italia a os 87 anyos

Bersani dimitirá como cabeza d'o centro-cucha por a indisciplina d'os diputaus d'a suya formación

napolitano

O president italiano Giorgio Napolitano

Giorgio Napolitano estió reeslechiu o sabado president d’Italia en una sesión conchunta d’a camara de diputaus y d’o senau con 739 votos d’os 1.007 emitius. Superó ampliament os 504 votos necesarios ta estar eslechiu. Napolitano acceptó presentar a un segundo mandato a tamás d’a suya edat, 87 anyos, por a imposibilidat de trobar un candidato con posibilidatz de victoria. Napolitano redotó a o candidato d’o Movimiento Cinco Estrelas, Stefano Rodotà, que se levó 217 votos. Ye o primer president italiano que repite mandato.

Entre a cinquena votación, que s’heba feito de maitins, a mayoría d’os parlamentarios heban votau en blanco dimpués d’o desacuerdo d’o viernes sobre o candidato y dimpués de crebar-se a unidat d’a coalición de centro-cucha.

O mas votau o sabado de maitins heba estau l’academico de cuchas Stefano Rodotà, proposau por “l’antisistema” Movimiento Cinco Estrelas, con 210 votos pero a muita distancia d’os 504 necesarios. D’a suya banda, l’alianza de centro-dreita dirichida por Silvio Berlusconi heba boicoteyau a votación.

Dimisión de Bersani

Por a suya parte, o secretario cheneral d’o Partiu Democratico (PD) d’Italia, Pier Luigi Bersani, heba anunciau que abandonaría a maxima responsabilidat d’a formación quan o parlamento hese trigau o nuevo president d’a Republica. Bersani recibió de Napolitano l’encargo de formar gubierno dimpués d’as esleccions lechislativas de febrero y, dimpués d’o fracaso en iste obchectivo, o suyo liderazgo heba quedau en evidencia en as propias filas mientres a votación ta trigar a nueva cabeza d’estau.

O PD presentó en un prencipio a candidatura de l’expresident d’o senau, Franco Marini, consensuada con o Pueblo d’a Libertat (PDL) de Silvio Berlusconi. Pero, dimpués d’o fracaso d’ista opción en as dos primeras rondas de voto, o PD recurrió a l’exprimer ministro y expresident d’a Comisión Europea Romano Prodi, que o viernes tampoco no aconsiguió os votos necesarios.

Bersani ye muit carranyau con os diputaus y senadors d’o partiu que no han seguiu as indicacions de voto en a eslección presidencial. ‘Uno de cada quatro nos ha traicionau. Ye inacceptable‘, dició Bersani. A votación ye secreta, pero os resultaus d’as diversas rondas que s’han feito han meso de manifiesto as divisions d’o centro-cucha y a fuga de votos.

Fuent: http://www.vilaweb.cat/noticia/4107299/20130421/napolitano-reelegit-president-ditalia-87-anys.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.