Naufraga un pesquero con 700 personas a bordo t’o norte de Libia

A Guardia Costera italiana confirma que s'ha recuperau 24 calavres, encara que as labors de salvamento continan. 28 immigrants ha estau rescataus con vida

Plegada d'immigrants en Lampedusa. Foto: Micniosi

Plegada d’immigrants en Lampedusa. Foto: Micniosi

Un barco pesquero con cerca de 700 personas a bordo que prebaban d’alcanzar as costas europeas ha naufragau entre a pasada nueit t’o norte de Libia, a 120 millas de Lampedusa. O diario italiano  La Repubblica apunta que por agora 28 personas ha estau rescatadas con vida y s’ha recuperau a lo menos 24 calavres, seguntes confirma a Guardia Costera italiana, encara que as labors de busca continan.

L’Alto Comisionau de Nacions Unidas t’os Refuchiaus (ACNUR) ha alvertiu que iste naufrachio entre as costas de Libia y Italia puede fer-se a mayor trachedia d’a historia d’os desplazamientos d’immigrants en o Mediterranio. “Si se confirman istas cifras, en os zaguers días habría muerto mas de 1.000 immigrants en istas auguas“, ha afirmau Sami Carlotta, portavoz d’ACNUR a RaiNews 24. A portavoz ha interpelau una vegada mas a la Unión Europea ta que “meta solución a iste problema”.

Un d’os primers barcos d’a Marina en plegar en o puesto d’o naufrachio fue o ‘Gregoretti’, que aconsiguió prestar socorro a os 28 supervivients. Ista embarcación ha estau l’abanzadilla d’una “masiva operación”, seguntes as autoridatz italianas, en que son participando barcos, avions, helicopters y barcos mercants d’a zona.

A coordinación d’a operación corre a cargo d’a Guardia Costera italiana y en ella son involucraus tamién vaixiellos y aeronaus de l’Armada y d’a Operación europea Tritón, de l’Achencia Frontex. Una fuent de l’Armada de Malta puntualizó a Efe que en a zona d’o siniestro “son desplegadas 17 unidatz coordinadas por Italia”.

Dau que a temperatura de l’augua no ye masiau freda, uns 17 graus, os servicios de rescate confitan en trobar encara supervivients a la trachedia que haigan aconsiguiu mantener-se a flote en o mar agafaus a bella resta d’a nau.

As primeras informacions ofridas por  La Repubblica apuntan que a voz d’alarma partió d’un barco pesquero portugués, o King Jacob, que trucó a la Guardia italiana arredol d’a medianueit d’a presencia d’un barco pesquero repleto d’immigrants d’uns 30 metros d’eslora.

En avistar a embarcación, os immigrants se desplazoron de bote y boleyo enta un d’os costaus d’o pesquero ta trucar o ficacio d’o buque portugués, o que fació vulcar o barco. Se trobaban, seguntes quantos medios italianos, a 70 millas d’a costa de Libia.

Ista semana, o Mediterranio se fica en augua de trachedia como a pior rechistrada en numero de muertes de personas que prebaban d’alcanzar Europa. Antes d’o naufrachio d’iste buque, o fundimiento o luns d’una embarcación con unas 400 personas desapareixidas y d’unatro  barco con 41 personas sin localizar mientres o chueves elevoron as cifras d’Acnur a 950 personas fallecidas en 2015.

Istas zagueras trachedias, as guerras que asolan os países emisors de refuchiaus y migrants, como Siria, y a inexistencia d’una operación europea de rescate en o Mediterranio fan temer a las organizacions humanitarias y a las Nacions Unidas que o record de l’anyo pasau como o pior en numero de victimas mortals, con a lo menos 3.224 personas fallecidas en as suyas auguas, siga superau en 2015.

Mientres organizacions como Amnistía Internacional y actors como as Nacions Unidas exichen una respuesta urchent que pase por o salvamento, a Comisión ha reconoixiu ista semana que “no tiene ni os diners ni l’emparo politico ta lanzar un sistema de protección de buegas europeu capable de buscar y rescatar“, ha afirmau a suya portavoz, Natasha Bertaud.

A respuesta en Europa

Iste luns ye prevista una reunión d’os ministros d’Exteriors d’a Unión Europea en que s’abordará, entre atros temas, a dramatica situación que se vive en o Mediterranio. Dimpués de conoixer a noticia, a chefa d’a diplomacia comunitaria, Federica Mogherini, ha instau a la UEa abordar sin demora a trachedia d’os naufrachios en auguas mediterranias. “Hemos dito masiadas vegadas ‘nunca mas’. Hemos de salvar vidas humanas totz chuntos, totz chuntos amenistamos protecher as nuestras buegas y luitar contra o trafico de sers humanos“, ha afirmau Mogherini.

“A respuesta no ye a l’altura d’a dimensión d’o problema: o drama que ocurre y l’aumento d’immigrants potencial ye enorme“, ha reconoixiu por atra parte una fuent d’alto livel diplomatica europea. A tamás d’ixo, a mesma fuent ha almitiu que “no i hai voluntat colectiva ta una operación maritima mas fuerte“. “No ye sobre a mesa”, ha recalcau.

“Totz somos conscients que a sangría cal aturar-la de bella traza (…) pero os Gubiernos no son por a labor de dar mas medios. Uns quieren a opción de salvamento y atros quieren aturar as cosas en tierra, ta aturar ixa salida masiva” d’immigrants, ha resumiu unatra fuent diplomatica.

Espanya ya ha deixau claro que no ye partidaria que Frontex asuma competencias de rescate d’immigrants con l’argumento que tendría un “efecto clamada”. O Gubierno espanyol achuga por a cooperación con os países d’orichen ta frenar a immigración, tot y que en os zaguers anyos as aduyas de cooperación a o desenrollo han sufierto un retalle de mas d’un 60%.

Sobre l’ocurriu s’ha pronunciau Mariano Rajoy mientres a suya intervención en un acto de partiu en Alicant. “No i hai garra nación que pueda fer frent solament a ista trachedia. A respuesta ha de venir d’Europa. Ya no valen as parolas, cal actuar. Son trachedias que se son producindo totz os días”, ha dito. “Os europeus nos chugamos o nuestro credito si no somos capables de privar istas dramaticas situacions“, ha adhibiu.

Fuent: http://www.eldiario.es/desalambre/Cerca-inmigrantes-desaparecidos-Mediterraneo-naufragio_0_379012127.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.