Nogara deixa a Coordinadera Aragón Trilingüe

A escuela d'aragonés deixa la Coordinadera por a suya configuración y trazas de treballar, entre atros motivos.

logoL’Asociación Cultural Nogara-Religada, una d’as principals escuelas d’aragonés de Zaragoza, ha anunciau que albandona a Coordinadera Aragón Trilingüe, d’a que feba parti dende que renaixió en a primavera de 2012. Asinas lo fació saber iste chueves a la resta d’asociacions y organizacions que forman a Coordinadera.

Ista Coordinadera prene o nombre d’a que convocó en 2009 una “manifestación por a igualdat d’as tres luengas”, arroclando-ie a millars de personas y convertindo-se en a más gran movilización en esfensa d’as luengas que bi ha habiu en Aragón. Nogara creye que “o mensache y recorriu d’a primer Coordinadera ye desvirtuau de tot y no’n queda que o nombre”.

Entre as razons t’a marcha d’ista asociación, bi ye una “falta de representatividat a tres libels: asociativo, de comunidatz de fabladors y politico” y creyen que a coordinadera “habría de representar a las diferents sensibilidatz arredol d’as luengas. A escuela d’aragonés antimás acusa a la Coordinadera d’estar politizada, lo que creyen que “ye un serio risgo t’a causa que habría d’esfender y ta todas as sensibilidatz políticas y socials que bi ha entre a comunidat aragonesofona”.

En o comunicau que han feito publico, denuncian a falta de respeto que bi ha habiu ent’a suya asociación y os planteyamientos que ista esfiende, lo que consideran “ye un menosprecio enta buena parti d’a comunidat de fablants y d’as personas que esfienden as nuestras luengas”.

Con tot y con ixo, Nogara s’ha amostrau disposada a “treballar por a causa” y  diz no tener un “desalcuerdo con a más gran parti d’os planteyamientos esfendius por a Coordinadera. O comunicau, de feito, lo rematan con una clamada a mantener “l’esprito que se tenió en o proceso de Chuntos por l’Aragonés en a suya forma de treballo y en a representatividat de totz os sectors embrecaus en a luenga, en especial, os parladors d’a luenga.”

A Coordinadera Aragón Trilingüe rebilcó en a primavera de 2012 en respuesta a las politicas lingüisticas que ye tenendo lo gubierno PP-PAR. En setiembre d’a mesma anyada fació publico un comunicau en Fraga que sinyoron organizacions de toda mena y que han iu presentando en diferents puestos y concellos, conseguindo lo refirme de beluns d’ells. O partiu politico Puyalón tamién l’albandonó en l’aviento pasau.

 

2 Rispuestas a Nogara deixa a Coordinadera Aragón Trilingüe

  1. Agora?? Si lo hesen feito cuan s’esboldregó a primer coordinadera y no hesen feito parti d’ista millor les hese estau y no hesen perdiu a toda la chent que perdioron. Asinas les va agora.

    Tot por haber laminaus culs a bells personaches que se saben vender muito bien, pero que no i son que por egocentrismo, no por l’aragonés. Beluno mesmo ha espantau dimpués d’as cagadas que fació.

  2. No sé a quí se laminó o culo, ni quanta chent se i perdió. Qui espantó u s’espantó, de qué cagadas?
    Estoi que todas estas historia cripticas ye una d’as cosas que no funcionan, ya cal que toda la chent que se i mueve, lo faga como lo faga se i meta a charrar de todas estas historias de traza ubierta y sin creyer-se perfectos, cal coordinar-se pero bien. O movimiento social ha perdiu aliento.

Responder a Dabi Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.