Nogará-Religada critica l’immobilismo d’o Concello de Zaragoza con l’aragonés

L'asociación considera que pese a o cambio d'actitut con l'aragonés, no se son executando as midas prometidas

nogaraEn un comunicau, l’Asociación Cultural Nogará-Religada ha quiesto fer publica a suya disconformidat con l’actuación d’o Gubierno municipal de Zaragoza respecto a las midas prometidas con l’aragonés, un anyo dimpués d’a constitución de l’actual concello.

Dende l’asociación comentan que “dimpués d’a ilusión inicial, hemos visto como ista tasament s’ha transformau en feitos, y han estau muit tasas as accions realizadas en favor d’a nuestra chicota luenga en a capital aragonesa, an que confluyen tanto fablants nativas procedents d’atras zonas d’Aragón como nuevas”.

Critican a falta de campanyas de sensibilización y actividatz de difusión d’a luenga aragonesa, mas que mas “ent’a población que no i parla u mesmo desconoixe a suya existencia”, asinas como una mayor presencia de l’aragonés en a difusión d’actividatz y campanyas d’o concello.

Asinas mesmo tamién remarcan que “no s’ha realizau garra acción dende o concello pa promover a ensinyanza de l’aragonés en institucions municipals, ni tampoco no s’ha procediu a la rotulación en bilingüe d’as carreras an que pueda realizar-se”, fendo-se tamién alcordanza d’a desaparición d’o concurso de coplas, an que podeba presentar-se obras en aragonés.

Con tot y con ixo, dende Nogará-Religada valoran positivament o cambio de mentalidat d’o equipe de gubierno de Zaragoza en Común respecto a l’aragonés, pese a l’immobilismo que denuncia l’asociación.

Entienden a “gran cantidat d’afers a tractar en una ciudat tant gran como Zaragoza”, pero consideran que “un anyo ye tiempo suficient pa haber-ne realizau un desenrollo minimo” en as politicas lingüisticas sobre l’aragonés.

A escuela d’aragonés acaba o comunicau dando gracias a o equipe de gubierno zaragozano “por levar a o pleno d’o concello a declaración de Zaragoza como ciudat d’uso historico de l’aragonés, que lamentablement fue allí refusada”. Una declaración que día a día va sumando mas y mas lugars en Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.