Nueva Democracia gana las eleccions griegas, pero habrá de negociar con o PASOK

Os socialistas d'o PASOK decidirán si participan en o gubierno d'unidat con ND. Syriza queda segunda a dos puntos de ND.

Antonis Samaras, lider de ND (Foto: Wikipedia)
Antonis Samaras, lider de ND (Foto: Wikipedia)

O partiu conservador Nueva Democracia ha ganau as eleccions griegas: tendrá 79 escanyos en o parlamento, más os 50 que a lei electoral griega regala a lo partiu que consihue más diputaus; 129, alavez. Dezaga bi ye a coalición d’a cucha radical Syriza, con 71 escanyos, dos puntos por debaixo de Nueva Democracia. En cifras absolutas nomás 170.000 votos han separau Nueva Democracia de Syriza sobre un total de 6,2 millons de votants.

Malas que se ha conoixiu o resultau, Nueva Democracia ha proposau un gubierno a os socialistas d’o PASOL, a tercer fuerza, con 33 escanyos. Sumaus os diputaus d’os dos partius, superarían a mayoría absoluta de 151 escanyos, pero o PASOK encara no ha decidiu que ferá. Nueva Democracia recibirá hue l’encargo de formar gubierno, de man d’o presiden Karolos Papouilias.

Dimpués d’os tres partius principals ha quedau o Partiu d’os Griegos Independients, de dreitas y contrario a lo rescate, con 20 diputaus; os nazis de Amaneixer Dorau con 18 y que ha manteniu contra pronostico o mesmo porcentache de votos que fa un mes; a Cucha Democratica, con 17, y o Partiu Comunista con 12.

Respecto a las eleccions d’o mes de mayo, Nueva Democracia ha ganau 21 escanyos, Syriza en ha ganau 19, o PASOK en ha perdiu ueito, os Griegos Independients en han perdiu 13, os nazis en han perdiu tres, Cucha Democratica en ha perdiu dos y o Partiu Comunista en ha perdiu 14.

O president d’o partiu conservador Nueva Democracia, Antonis Samaras, ha convocau a os partius griegos t’a formación d’un gubierno de concentración destacado que os griegos han decidiu de continar en l’euro. ‘Convidamos a todas as fuerzas que comparten istas conviccions a participar en un gubierno de salvación nacional. No bi ha tiempo que perder. No i cullen as politicas de partiu’, ha afirmau Samaras en o discurso a on ha proclamau a victoria, dende a siede de Nueva Democracia en Atenas.

O PASOK no ha dau encara respuesta oficial a lo convite. Fuents socialistas han afirmau que o más probable ye que refirmen a o gubierno dende o parlamento y sin dentrar a fer parti d’a coalición, cosa que lo fería feble de tot. As diferencias entre os dos partius, que dominan dende fa decadas a politica griega, son importants, a tamás de que comparten o refirme a lo rescate europeu. Por eixemplo, no son d’alcuerdo en a politica fiscal que cal aplicar u en as retalladas a los funcionarios, a on que Nueva Democracia ye muito más radical que no los socialistas. Cuanto a la emigración, un d’os puntos clau d’a campanya, tamién tienen firmes diferencias porque ND ye partidaria de forachitar en masa a los emigrants y o PASOK lo refusa.

O menador d’a coalición de cucha radical Syiriza, Alexis Tsipras, ha anunciau que, d’a suya man, ferá una oposición ‘honorable’ reclamando a renegociación d’os pactos con a Unión Europea. Tsipras ha dito que bi habrá movilizacions en a carrera y que en o parlamento a coalición será implacable en a denuncia d’o memorandum d’o rescate.

A nueva cucha griega ha puyau notablement o voto y ha pasau d’o millón de votants d’o mes de mayo a un millon seisciento mil. A más gran parti d’o nuevo voto ye plegau dende oPartiu Comunista que en ha perdiu 200.000, y d’o PASOK. Os votants tradicionals d’o PASOK pareix que s’han repartiu entre Nueva Democracia y Syriza. O Partiu d’os Griegos Independients, de dreitas y contra o rescate, ye l’atro partiu que más votos ha perdiu, tot indica que reendrezaus ta Nueva Democracia. Os nazis de Amaneixer Dorau, a la fin, han perdiu bells mils de votos, pero continan con fuerza a tamás d’as agresions protagonizadas en as zaguers semanas.

O partiu d’os Democratas de Cucha tamién s’ha ufierto a fer partiu d’un gubierno con Nueva Democracia y PASOK. En istas eleccions han perdiu dos diputaus pero han conservau practicament o mesmo numer de votos y se presentan a si mesmos como a fuerza que podría equilibrar as tensions entre Nueva Democracia y o PASOK en un executivo d’unidat nacional.

Fuent: http://www.vilaweb.cat/noticia/4021052/20120618/nova-democracia-guanya-eleccions-gregues-haura-dentendres-pasok.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.