Nuevas crepazas en Yesa, a l’atro diya de que De Pedro decise que ya no bi heba problemas de seguridat

As brecas salen dillá d'a zona de seguridat que decretó la CHE

Una d'as brecas difueras d'a zona de seguridat (Foto: Yesa + NO)

Una d’as brecas difueras d’a zona de seguridat (Foto: Yesa + NO)

As laderas de l’entibo de Yesa, en a muga d’Aragón con Navarra, continan viyendo apareixer diya par d’atro nuevas crepazas. Asinas lo han denunciau as asociacions Río Aragón y Yesa + No, que se oposan todas dos a lo recreiximiento d’iste entibo. Istas crepazas han apareixiu chusto a l’atro diya de que Xabier de Pedro, president d’a Confederación Hidrografica de l’Ebro anunciase que “os problemas de seguridat en a presa d’o entibo yeran apanyaus”, reconoixendo asinas “bella cosa que ha negau mientres quasi dos anyos: que ixos problemas existiban“, recordan os opositors a l’entibo.

As dos asociacions han feito un repaso d’os feitos dende que apareixioron as crepazas que facioron vuedar bellas casas en a urbanización Lasaitasuna d’o lugar de Yesa (Navarra) muito cerca de Sangüesa. Son 25 millons d’euros os que s’han gastau en mirar de estabilizar as laderas d’o entibo sin que s’haiga conseguiu de tot. Tamién acusan a la CHE d’haber “deixau de ninviar os datos d’as medicions en a ladera alos organismos publicos”. Os opositors acusan dreitament de mentir a iste organismo, y meten as fotos d’as brecas d’agora como eixemplo. Antimás han recordau que “ya en 2006, a Confederación amagó mientres siet meses o deslizamiento d’o mont Melida en a parte cucha” y que en 2013 “tardó 8 meses en reconoixer os movimientos, quan a suya postura ya yera insostenible y o desaloix d’as urbanizacions urchent”.

A CHE fació una zona de seguridat, a on que prencipian istas nuevas crepazas. Manimenos, istas se’n salen d’ixas mugas “decenas de metros”, denuncian os vecins. “Tanto si la Confederación conoixeba iste movimiento y lo ha amagau, como si no’n ha parau cuenta, consideramos os feitos de toda gravedat, que tornan a amistrar a incompetencia y opacidat d’a CHE”, sinyalan.

As asociacions rematan o suyo nuevo comunicau demandando que s’aturen as obras que, recordan, ha cuadruplicau o suyo presupuesto dende o primer que tenió. Tamién demandan que se vuede l’entibo dica un livel de seguridat acceptable, que se deixe d’amagar información y de mentir y que se prengan “responsabilidatz tecnicas y politicas por a penible chestión d’a obra”, entre atras cosas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.