Nuevo ciclo de tallers agroambientals t’os más chiquetz en L’Alfranca

As actividatz, que se ferán os domingos de 11 a 12:30 son endrezadas más que más t'a catrinalla d'entre 6 y 12 anyadas

Debuixos d'os ninos en un taller (Foto: D.Ch.A.)

Debuixos d’os ninos en un taller (Foto: D.Ch.A.)

O domingo 24 prencipió un nuevo ciclo de tallers agroambientals infantils en o Espacio La Alfranca, que continará con a celebración d’o Campus de Semana Santa, mientres as vacanzas escolars d’os más chicotz. Ista iniciativa, promovida por o Departamento de Agricultura, Ganadería y Meyo Ambient a traviés de SARGA, suposa una alternativa de ocio familiar de gran valor y posibilidatz en estar bien amanau t’os arredols d’o Galacho de L’Alfranca.

Os tallers, que se ferán en horario de 11 a 12:30 son endrezaus t’a catrinalla d’entre 6 y 12 anyadas, y o suyo obchectivo ye creyar una conciencia social sobre a importancia d’a nuestra actividat agraria, y de que cal respetar y cudiar o meyo ambient arredol nuestro y con o que convivimos.

As actividatz continan con o Campus de Semana Santa, que se ferá entre o 1 y o 5 d’abril en horario de 8:30 a 17:30, a on que a zaragalla ferán actividatz, chuegos y manualidatz en o Espacio La Alfranca. O 14 d’abril se ferá o taller “Creyando espantapaixaros” a on que os ninos descubrirán o poder d’a reutilización de materials creyando-ne uno. O 21 d’abril, os minerals serán os protagonistas en un taller a on que se prenerá un primer contacto con as suyas formas y colors y s’aprenderá a distinguir-ne bells quantos. “Fe a tuya cometa”, ye o titol d’o taller d’o 28 d’abril, a on que os ninos ferán as suyas propias cometas de vez que aprenden como vuelan as aus. O ciclo remata con un taller o diya 5 a on que, a pur de productos reciclaus como tetrabricks, a catrinalla construyirá refuchios t’aus chicotas y conoixerán os muixons que tienen más amanaus.

T’apuntar-se-ie, cal visitar a web www.ciaralfranca.com, ninviar un correu a info@ciaralfranca.com u gritar a o telefono 976 109 285.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.