Nuevos documentos de Bárcenas comprometen a o PP de Cospedal

L'extresorero d'o PP entregó un documento a o chuez que revela un supuesto cobro de 200.000 euros de Sacyr

el mundo cospedal

O documento reproduciu por El Mundo

A secretaria cheneral d’o PP, María Dolores de Cospedal, calificó ahiere de calumnias y mentiras as declaracions que l’extresorero d’o suyo partiu, Luis Bárcenas, fació a o chuez de l’Audiencia espanyola Pablo Ruz. Entre a documentación que entregó Bárcenas a o chuez como preba, y que hue publica El Mundo, i hai un recibimiento d’una presunta comisión de 200.000 euros que recibió o PP de Castiella-La Mancha, estando Cospedal presidenta d’ista comunidat. Uns diners que, seguntes Bárcenas, habría pagau Luis del Rivero, alavez president d’a constructora Sacyr, a cambeo de l’adchudicación d’a replegada de vasuera en Toledo.

Bárcenas heba afirmau que tanto ella como o president d’o gubierno espanyol, Mariano Rajoy, cobroron diners en efectivo d’a suya man.

O documento diz, textualment: ‘He recibiu de Luis Bárcenas con calendata 12/02/2007 100.000 euros, y con calendata 28/03/2007 100.000 euros. Madrit, 28 de marzo d’o 2007.’ Y bi ye a sinyatura de José A. Cañas Cañada, que yera, y encara ye agora, o cherent d’o PP en Castiella-La Mancha y un d’os hombres de maxima confitanza de Cospedal. En l’extremo inferior dreito d’a fuella ha apuntau o nombre de Luis del Rivero.

Bárcenas admitió a o chuez haber feito entregas de cantidatz de diners en efectivo a o president d’o gubierno espanyol, Mariano Rajoy, y a Cospedal, en 2008, 2009 y 2010. Concretament, dició que heba pagau 25.000 euros en efectivo y en billetz de 500 a Rajoy y Cospedal en concepto de sobresueldos en 2010.

Cospedal, a la defensiva

Seguntes De Cospedal, Bárcenas actúa d’ista traza pa prebar d’esvarrar o foco sobre l’orichen d’o suyo patrimonio. En iste marco ha afirmau que ella no ha recibiu nunca sobresueldos irregulars, y ha negau taxativament que o PP ufrise a Bárcenas un pacto de silencio.

Seguntes a secretaria cheneral d’o PP, as cuentas d’o PP no tienen ‘garra irregularidat’ y ‘a unica contabilidat’ que o PP reconoixe ye a que entregó a o Tribunal de Cuentas. ‘Qualsiquier atro papel que refleixe atra contabilidat diferent no ye a d’o PP y o suyo autor sabrá a que corresponde y porque l’ha feito’.

De Cospedal tamién ha negau os sobresueldos a la cupula d’o PP y ha afirmau que totz os sueldos d’a cupula d’o PP son de tot chustificaus y son legals. Tamién os que n’ha percibiu ella, que seguntes Bárcenas recibió 25.000 euros d’a contabilidat B en 2010, una acusación que ella ha afirmau que ye ‘de raso falsa’.

Tamién ha calificau de ‘taxativament falso’ que o president d’o PP, Mariano Rajoy, u ella mesma, haigan presionau de traza directa u indirecta a Luis Bárcenas pa fer cosa. ‘Ni coaccions, ni sobornos, ni zarrapita ni pon d’ista naturaleza‘, ha sentenciau en referencia a la información de El Mundo que apuntaba que o PP ufrió un pacto de silencio a Bárcenas.

De Cospedal tamién ha negau garra irregularidat en o PP de Castiella-La Mancha entre o suyo mandato y ha asegurau que ‘a unica explicación posible a la ripa de falsedatz y calumnias’ ye que Bárcenas fa un poder por ‘salir indemne’ d’a trama en que ye embrecau.

Fuent: http://www.vilaweb.cat/noticia/4134016/20130716/nous-documents-barcenas-comprometen-pp-cospedal.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.