O 15M de Uesca clama a continar con a presión social contra os desafucios

S'habilita un telefono y un correu electronico ta aduyar a los afectaus

Protesta contra os desafucios (Foto: @acampadazgz)

Protesta contra os desafucios (Foto: @acampadazgz)

L’Asambleya d’o 15M de Uesca considera, dimpués de analizar o decreto aprebau por o gubierno espanyol a semana pasada, que iste “ha reblau una vegada más debant d’a presión d’a banca planteyando midas que escluyen a la mas gran parto d’as personas afectadas” y considera inacceptable que no s’haiga encetau un plan d’emerchencia social ta ellas debant d’iste chandrío”.

Iste movimiento ciudadan ha presto un telefono (655175119) y un correu electronico (vivienda@huesca15m.org) ta que totz os afectaus por desafucios u hipotecas puedan demandar a suya aduya. Tamién lo podrán fer dreitament en as reunions d’o colectivo, totz os miercols a las 20 en l’Asociación de Vecins d’o Casco Viello u en l’asociación Red RAI (Rete de Cabidadors y Inversors) en Avda. Pirineos, 28, baixos.

O 15M clama a que “no se reble en a presión ciudadana y demanda l’aduya de todas las personas, incluyius os treballadors publicos que por o treballo suyo haigan d’intervenir de bella traza en os procesos de desafucios, ta aturar iste drama y dar una salida que proteixa a las personas”.

Seguntes iste movimiento ciudadan “PP y PSOE han plegau tardi y mal t’o drama d’os desafucios“. Consideran que as midas planteyadas deixan difuera a la mas gran parti d’as personas afectadas” y meten un eixemplo: “familias con dos fillos a o cargo suyo, que sigan cobrando un subsidio por estar esqueferaus de 420 euros a o mes, un caso muito freqüent – se quedan difuera d’a posibilidat d’aturar o desafucio”. Remeran tamién que no se diz cosa d’as mas de 350.000 personas desafuciadas ya en tot l’estau, u de midas como a dación en pagas retroactiva u o loguero social vinclau a la renta.

O 15M de Uesca creye que “cal meter en marcha un plan d’emerchencia social t’as personas afectadas por ista catatrofe provocada por unos bancos saqueadors y unos politicos vendius a los suyos intreses” Por ixo, continarán con a “presión social denunciando ista situación provocada por un sistema inchusto y mirando solucions colectivas”.

Encara que reconoixen que no ye una solución, o 15M finalment anima a presentar en os chuzgaus toda a documentación que cal t’aturar os procesos de desafucios,e ncara que a mas gran parti d’os casos no s’accepten ta poder aturar mientres bells meses os desafucios.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.