O “25S” se salda con duras cargas policials

64 personas feridas y 35 detenidas (entre ellas un aragonés) ye o balance d'o "25S", que rodió o Congreso a tamás d'a fuerte y violenta presencia policial

Foto: Fotogracción.org

Ahiere una gran marea humana rodió o Congreso d’os Diputaus espanyol, convocaus por a “Plataforma en pie”. Muita chent s’unió dende atros puntos de l’Estau espanyol, entre ells Zaragoza. Bells autobuses salioron d’esferents ciudatz y sufrioron controls, calificaus por as fuerzas de seguridat espanyolas como “rutinarios”, en os que identificoron y rechistroron a os viachers.

O diya continaba en Madrit con bellas asambleas d’organización y un Congreso blindau dende semanas y con una presencia policial de 1.400 achents plegaus dende totz os cabos de l’Estau perteneixents a las UIP (Unidatz d’Intervención Policial). Continos controls y identificacions en os arredols d’o Congreso se sucedeban mientres s’amanaban as 18 h., a hora en que se fería l’acción de rodiar o Congreso, calificada como un “golpe d’estau” por a delegada d’o gubierno espanyol en Madrit, Cristina Cifuntes.

Y a la fin, se decidió de rodiar a camara baixa, con una gran cantidat de chent mas que mas en a Pza. Neptuno y o Pº d’o Prau, cusiraus bien amán por a policía nacional espanyola, demandando a dimisión d’o gubierno y a obridura d’un proceso constituyent. Os diputaus d’as collas parlamentarias de IU-ICV-CHA, BNG, Amaiur y Compromís salioron d’o Congreso ta unir-se a la concentración reivindicativa. Arredol d’as 19 h. a policía prencipió a cargar en a Pza. Neptuno. Bells manifestants preboron de sacar as cletas que empachaban l’acceso ent’o Congreso. As cargas iban sucedendo-se por esferents puestos, mas que mas a Pza. Neptuno, a Carrera de Sant Cheronimo u o Pº d’o Prau, encara que, manimenos, a chent no rebló d’a suya posición. Mesmo a chent pareixeba rodiar a la policía. As cargas con porras y pilotas de goma, muit criticadas por a suya violencia y desproporción (mesmo se sospeita d’infiltraus policials), sembroron o caos en o centro d’a ciudat, deixando scenas terribles de personas feridas y querendo-se acubillar en comercios y bars. Mesmo i habió cargas en os andens d’a estación d’Atocha. O gubierno espanyol, a traviés d’o suyo ministro de l’Interior, Jorge Fernández Díaz, ha calificau as cargas de “proporcionadas” y ha felicitau a la policía.

Como balance d’os enfrontinamientos entre manifestants y policías, dica alto u baixo a meyanueit, i habió 35 personas detenidas (entre ellas un aragonés que encara contina deteniu) y 64 personas feridas, entre ellas periodistas, que una vegada mas, han sufriu a violencia policial. As personas detenidas podrían estar imputadas, amás de delitos de desordens publicos, d’un delito contra “as altas institucions d’a nación”, chudgau en l’Audiencia Nacional.

En atras ciudatz se facioron actos en refirme d’a protesta. En Zaragoza unas 400 personas se concentroron en a Pza. d’o Pilar ta rodiar a delegación d’o gubierno espanyol. Posteriorment siguioron os acontecimientos de Madrit en una pantalla en a plaza.

Hue continan os actos de protesta. En Madrit se pretende tornar t’o Congreso, mientres en Zaragoza, Uesca, Teruel u Chaca se ferán esferents movilizacions en refirme a las vadas chenerals de hue en Euskal Herria sur y Grecia, amás de concentracions en refirme a las personas feridas y detenidas ahiere en Madrit.

Mas fotos: http://fotograccion.org/wp/

Bells vidios:

https://www.youtube.com/watch?v=BUVr-Lcnq-8

http://www.youtube.com/watch?v=4FLW4OjlcrU

http://www.youtube.com/watch?v=tBEs8xp1zZo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.