O 36,6% d’os productos de bollería no alporta información nutricional correcta

A Dirección Cheneral de Consumo d'Aragón ha analizau a bollería. Por un regular cumple a normativa.

bollosDesayunar-se u brendar a pur de bollos no ye raro entre os chovens. Una practica muito criticada por os profesionals d’a salut, ya que puya os casos de sobrepeso y d’obesidat entre os ninos. Ta controlar ista mena de productos, a Dirección Cheneral de consumo d’Aragón ha feito una serie d’analisis ta controlar istos productos.

Seguntes ha confirmau lo Gubierno d’Aragón ye un estudio con dos fases bien esferenciadas: a primer ye “nomás ta cusirar a on que se compreban una serie de requisitos fixaus d’antis en un protocolo”. En a segunda fase se prenen muestras ta complementar a primera.

En os etiquetaus d’istos productos cal que apareixca siempre a denominación de venda, o listau d’ingredients en orden decrexient, a indicación d’o conteniu, a referencia a calendatas de caducidat u consumo preferent, os datos identificativos d’o responsable, a presentación d’ista información, a luenga, l’altaria d’as cifras y a indicación d’o lote. Cuanto a la información nutricional se compreba que os productos cumplen lo que i dicen, ye decir, que realment no tienen zucres u grasas adhibidas. Antimás, t’os productos sin zucres se compreban as valors de fructosa, glucosa, lactosa, maltosa y sacarosa.

Os resultaus no han dau datos que calga fer-se-ne masiau. Cuanto a l’etiquetau, no se i han trobau anomalías, fueras de tres productos que a grandaria d’as letras no yera correcta. O resultau más destacau ye que, en un 36,6% d’os casos analizaus, a información nutricional no yera correcta ya que se i deciba que o producto yera sin bella mena de grasa y no meteba información cuanto a lo conteniu global d’istas.

Os datos de l’estudio, determinan que o grau de cumplimiento ye arredol d’un 54%, encara que quasi totz os fallos son por una incorrecta indicación en l’etiquetau nutricional. “No ye malo consumir ista mena de productos de bollería, pero sí fartar-se-ne. Ye alazetal que os consumidors leigan fito fito a información que apareix en as etiquetas d’istos productos antimás d’apostar por mantener una dieta equilibrada entre os más chovens”, aseguró Sergio Larraga, director cheneral de consumo.

Fuent: http://www.aragon2.com/n-20175-2-El_366_de_los_productos_de_bolleria_no_aporta_informacion_nutricional_correcta

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.