O 43 Festival Internacional de Cine de Uesca ixampla a suya proposa con una versión online

D'o 13 a o 20 de chunio se celebrará una nueva edición d'iste festival cinematografico

Representants d'a organización mientres a presentación d'o festival. Foto: AraInfo

Representants d’a organización mientres a presentación d’o festival. Foto: AraInfo

A 43 edición d’o Festival Internacional de Cine de Uesca ye presta ta fer-se o “centro d’atención d’o curtometrache a livel mundial” d’o 13 a o 20 de chunio. A organización d’o certamen altoaragonés ha presentau iste mierques toda a programación que en ista edición contará entre as suyas novedatz con o “Festival Uesca en casa”, a suya versión online.

A las sesions programadas en ista 43ª edición d’o festival, se les suma agora a posibilidat d’o visionau d’os curtometraches a traviés d’a plataforma Festhome on demand, disponible dende o domingo 14 dica o martes 30 de chunio, fendo-se asinas a cita oscense en un certamen multiplataforma. Ista nueva ufierta, ubre a puerta a qualsiquier persona dende qualsiquier parte d’o mundo, ta visionar gran parte d’os tres concursos que conforman a sección oficial a traviés d’a pachina web ondemand.festhome.com.

O visionau de cada sesión será disponible dende o día en que se programe en o festival, siempre previo paso por a taquilla online y l’adquisición d’a sesión (3 euros) u o pase completo de 12 sesions (15 euros). Una vegada finalizau o periodo d’activación d’o “Festival Uesca en casa” (30 de chunio), l’acceso a os curtometraches ya no será disponible. A cantidat ingresada por a taquilla se repartirá en partes iguals entre o Festival Internacional de Cine de Uesca (organizador d’o festival), Festhome LTD (interpresa proveedora d’o servicio) y os cineastas participants.

Ista nueva plataforma de visionau suposa amás una achuga d’o certamen por as nuevas tecnolochías, bella cosa que se veye refrendada con diversas actividatz profesionals y presentacions de nuevos dispositivos audiovisuals que se desembolicarán en o Parque Tecnolochico Walqa. Chunto a ista mesa tecnolochica, a organización mantiene belunas d’as claus de l’exito de pasadas edicions y que miran aunar a o publico y os diversos achents economicos d’a ciudat; actividatz que van a estar repartidas mientres tot o festival y englobadas en diferents focos d’atención (turismo, hostelería y comercios, atros publicos, actuacions mosicals y industria).

Un churau “de muito peso”

Os 82 curtometraches trigaus t’a present edición se prochectarán dende o domingo 14, en dos sesions diarias, en horarios de 17.00 y 19.30 horas, fueras d’o domingo que serán de 12.00 y 17.00 horas. “Seguimos treballando por y t’o publico y por ixo se mantendrán as sesions mixtas y en horarios amables t’o espectador” declaraba Azucena Garanto, directora d’o festival.

Respective a o churau, Garanto no dubda en confirmar que “s’ha aconseguiu un grupo de profesionals de muito peso que abarca todas as disciplinas”. Os miembros encargaus de discernir os premios d’o concurso internacional serán o productor de Zentropa International Spain, David Matamoros; Mario Dorminsky, director y fundador de Fantasporto, un d’os festivals de referencia d’o Estau francés; y a polifacetica actriz Natalia Sánchez, reconoixida por as suyas interpretacions en cine, teatro y televisión.

O churau iberoamericano contará con Eva Tarr, directora d’o London Latin Film Festival; o director y guionista Manuel Martín Cuenca, creador de cintas como “Caníbal” u “La flaqueza del bolchevique”; y a uescana Luz Gavás, escritora d’obras como “Palmeras en la nieve” u “Vuelvo a tu piel”.

Finalment, o concurso documental tendrá como churau a Lola Salvador, novelista, guionista y productora reconoixida con o Premio Nacional de Cinematografía 2014; Chris Fell, director d’o Leeds International Film Festival; y a periodista y reconoixida corresponsal de RTVE, Rosa María Calaf.

O festival conserva o suyo espacio t’os largometraches con a muestra “Nuevos Realizadors Iberoamericanos”. Una achuga que se mantiene fidel a la esencia d’o certamen en a busca de nuevos talentos. Estrenos en Aragón como l’archentina “Pistas para volver a casa”, titols multipremiaus como as mexicanas “Güeros” y “Cuatro lunas” u a uruguaya “Mr. Kaplan”, asinas como recients achugas d’o cine espanyol como “Tiempo sin aire”, conformarán a sección que se podrá veyer d’o luns 15 a o viernes 19 de chunio.

Fuent: http://arainfo.org/2015/05/el-43-festival-internacional-de-cine-de-uesca-amplia-su-propuesta-con-una-version-online/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.