O Balonmano Aragón anima a os suyos aficionaus a continar creixendo

L'equipo chugará ista temporada en o pabellón Sieglo XXI

Foto: Cronica d'Aragón

Foto: Cronica d’Aragón

O Club Balonmano Aragón ha presentau iste viernes a suya nueva campanya d’abonaus con a que preba d’embrecar a l’afición ta que con o suyo empente “pueda fer a millor temporada posible y tornar a fer vistero a escape o nombre d’a nuestra ciudat por as millors pistas d’Europa”, tal y como ha asegurau o president de l’equipo, Eduardo Acón, que s’ha meso como obchectivo plegar en a cifra de 2.000 personas con carnet.

Seguntes Acón, en ista nueva campanya d’abonaus t’a venient temporada, dende a Dirección d’o Balonmano Aragón, s’ha parau cuenta tanto d’as especials circunstancias por a on que ha pasau o club como d’haber de contar con o refirme de l’afición ta fer tirar entabant o prochecto. Ta ixo, s’ha meso un pre especial d’abono de tribuna a 120 euros, y contina la botifuera d’o 50% ta chubilaus mayors de 65 anyadas, menors de 20 anyadas y esqueferaus de larga duración.

Antimás, t’aumentar o suyo publico, ista botifuera d’o 50% tamién s’aplicará a os abonaus d’o Reyal Zaragoza, socios de l’Estadio Miralbueno El Oliver, y pais y mais de ninos federaus en Balonmano en os Chuegos Escolars d’Aragón. L’abono d’os ninos dica 13 anyos (incluyius) ye de 30 euros.

Asinas mesmo, Acón ha aprofeitau l’acto de presentación d’a campanya ta recordar que iste anyo l’equipo fa casamuda y chugará os suyos partius como local en o pabellón sieglo XXI, “bella cosa que levará bell cambio chicot ta l’afición”.

D’ista traza, ya no se podrán alzar as localidatz como dica agora, pero sí que se va a alzar o sector a on que cada abonau se posará. “Prebaremos d’asignar un sector que equivalga a lo que teneban  en o pabellón Principe Felipe, pero totz aquells abonaus que quieran esleixir un sector concreto, pueden pasar-se por a nuestra oficina a fer o cambio”, ha aclariu o president d’a entidat qui s’ha amostrau confitau con que os seguidors se trobarán comodos en a nueva siede y a que que continarán transmitindo la calor y l’animo “que siempre ha caracterizau a la nuestra afición”.

A enchaquia d’isa casamuda a un pabellón más chicot no ye atro que fer que a plantilla “sienta más amán a calor d’a grada”, manimenos o maximo responsable ha especificau que l’equipo podría tornar t’o Principe Felipe en bell partiu puntual a on que se preveiga más publico.

Mientres a presentación s’ha feito conoixer a imachen grafica que ilustrará la campanya. Ista amuestra a un borque que se’n ride en momentos de recibir un balón chunto a l’eslogan “¡Abona-te a lo balonmano y aduya-nos a creixer!”. L’obchectivo pasa por agafar nuevos aficionaus, parando cuenta d’os más chovens ta prebar de dispertar nuevas aficionaus que fayan a l’equipo más gran.

“Soniamos con fer a millor temporada posible y ta ixo contamos con l’animo, a rasmia y a choventut d’os nuestros canteranos; pero iste prochecto no tendría sentiu sin os aficionaus que son chunto a l’equipo dende as gradas, ye important que sintamos o suyo refirme ta poder concarar con guarencias ista nueva campanya que vien rebutient d’ilusión y nuevos retos, chuntos seremos más amán d’os nuestros obchectivos”, ha rematau Acón.

Fuent: http://www.cronicadearagon.es/wordpress/destacadas/el-balonmano-aragon-anima-a-sus-aficionados-a-seguir-creciendo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.