O Barcelona pasa por dencima d’o Reyal Zaragoza

Os ex-zaragocistas Piqué y Villa, autor de dos d'os gols de l'equipe culé

 O Reyal Zaragoza ha cayiu redotau por dos gols a zero debant d’o Barcelona en a trobada correspondient a la decimotercena chornada d’a Liga BBVA, disputau  en o Camp Nou. L’equipe aragonés ha planteyau un partiu defensiu ta prebar de aturar o chuego barcelonista, pero os gols marcaus por Piqué y Messi en o primer tiempo han meso en franquicia o partiu ta l’equipe de Guardiola, que ha marcau dos tantos mas en o segundo periodo por meyo de Puyol y Villa.

O plan zaragocista ha funcionau bien en o primer tramo d’o partiu, en que ha aconseguiu frenar a circulación de l’equipo local. Pero ixo ha durau nomás dica o menuto 18. Un gol de cabeza de Piqué a os veinte menutos de chugo, dimpués d’una absurda falta lateral feita por Juárez, ha ubierto o marcador t’os catalans.

Dende ixe momento, o Barcelona ha prencipiau a tener ocasions con mayor claridat, pero a buena actuación de Roberto ha privau una dimpués d’unatra as enrestidas d’os debanters locals. O Reyal Zaragoza ha teniu a opción de empazar o choque en una ocasión de Postiga, que dimpués de recibir de Juan Carlos, ha chocau o suyo disparo en o cuerpo de Piqué. Por contra, y en una chugada polemica, ha estau Leo Messi qui ha aconseguiu enciertar con o gol y enamplar l’avantalla local. A esfensa zaragocista reclamaba difuera de chugo, pero l’asistente no l’ha sinyalau y l’archentino ha batiu a Roberto con un tiro cruciau.

En a segunda parte, l’equipe zaragocista ha saliu una mica más entabant, con a dentrada a o campo de Lafita y Micael, por Luis Garcia y Barrera. O zaragozano Lafita ha feito dos buenas ocasions ta achiquir distancias, en os primers menutos dimpués d’a represa, pero no fació gol. Dimpués plegaría unatro truco en forma de gol, que iba a estar quasi definitivo. Puyol, nuevament en una chugada de dubdosa legalidat, marcaba a quemarropa debant de Roberto dimpués de recibir de Keita. Ixe tanto ha deixau practicament rematau o destín d’un partiu que David Villa ha zarrau con un remate de cabeza, a un quarto d’hora d’o final d’o partiu.

Con iste risultau o Zaragoza queda a las puertas d’a baixada, con un punto por dencima d’ixa zona, pero quan encara no han chugau garra d’os equipes que son por baixo d’os blanquillos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.