O bicipiquete atura o trafico d’autos en carreras principals de Zaragoza

Bi ha habiu intes de muita tensión con a policía y un deteniu

Bicipiquete en Avda. Madrid
Bicipiquete en Avda. Madrid

A las siet d’o maitin surtiba dende a plaza d’os Sitios de Zaragoza un bicipiquete formau por bells 500 manifestants en bicicleta. Mientres más de quatre horas han recorriu belunas d’as principals carreras d’a ciudat, fendo que s’aturase o trafico de vehiclos a motor en muitas d’ellas. Encara sin haber amaneixiu s’ha cruzau t’a marguin cucha a on bi ha habiu os primers concaramientos en cayer-se un motorista y fer-se una chiqueta baralla entre ell, bells ciclistas y a policia espanyola que bi heba.

Dende a Plaza d’os Sitios, a on que a policia ha identificau a beluns d’os ciclistas, a tensión con a policia ye estada constant. En bells intes han quitau as porras y han fotiu bell trucazo contra beluno d’os bicipiqueters. Por a pasarela d’o voluntariau, o bicipiquete tornaba t’a marguin dreita de l’Ebro y en o vico de l’Almozara ye a on que s’ha feito a detención.

En pasar os bicipiquete bi ha habiu reaccions de tot. Muitas d’as personas que iban en autos han chilau faltadas contra os manifestants, encara que tamién bi heba muitos cenyos y chilos de refirme t’a vada. En plegar en a universidat os ciclistas son estaus recibius con aplausos y chilos d’enfuelgo de man de os piquetes universitarios que, en ixe inte zarraban l’acceso principal d’o Campus d’a Plaza Sant Francho.

O bicipiquete ha rematau, quasi quatre horas y más de vinte quilometros dimpués en a Plaza d’o Pilar, a on que s’ha chuntau con atros manifestants de diferents colectivos y movimientos socials.

 

Una rispuesta a O bicipiquete atura o trafico d’autos en carreras principals de Zaragoza

  1. As vadas y os movimientos socials necesitan una reinvencion, esta ye buena prebatina.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.