O blog d’o periodista aragonés Antonio Broto, Chino Chano, gana o premio BOB 2012

O churau veye en o blog unatra anviesta d'a realidat cutiana d'o pais asiatico que queda luen d'os meyos de comunicación

O blog Chino Chano, d’o periodista aragonés Antonio Broto, ha estau trigau como ganador d’o premio Best of Blog 2012 en a categoría de blogs en espanyol. Antonio Broto, periodista, ye corresponsal de l’achencia EFE en China y o suyo blog ufre una anviesta d’as peculiaridatz d’o país asiatico, dillá d’os topicos y de l’actualidat politica y economica. Chino Chano leva en o rete dende zagueras de l’anyo 2005 y o suyo autor ya recibié atros premios como o Blasillo de Huesca de 2006, d’o Congreso de Periodismo Dichital, u o Premio Blog convocau por 20 minutos en 2006 tamién.

En a descripción de Chino Chano en os premios se diz que o blog “ufre un punto de vista diferent sobre China dillá d’a que en os meyos nomás que se veye una parte d’a realidat o país. Y no l’atra cara. Tracta de no estar polarizau y influyiu por os intréses internacionals sino simplament ofrir una anviesta de l’atra China, a normal, a d’a vida cutiana en o país”.

Os premios BOB’s son bells d’os más prestichiosos premios a bloggers de tot o mundo, convocaus por Deutsche Welle, y en 11 luengas esferents con a intinción de refirmar a libertat d’exprisión y o reconoiximiento a os blogs como meyo d’exprisión d’ista libertat. A gala en que s’entregarán os premios será o 25 de chunio en Bonn.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.