O blues plora por B.B. King

O lechendario guitarrista y compositor s'ha muerto en Las Vegas con 89 anyos

B. B. King en directo en 2009. Foto: Tom Beetz (CC-BY 2.0)

B. B. King en directo en 2009. Foto: Tom Beetz (CC-BY 2.0)

Riley B. King, o lechendario guitarrista conoixiu como B.B. King, s’ha muerto ista pasada nueit a la edat de 89 anyos en Las Vegas, seguntes ha informau a suya filla. O mosico estadounidense no s’ha puesto recuperar d’a deshidratación que sufrió o mes d’abril a causa d’a diabetes de tipo dos que feba mas de vint anyos que sufriba. Yera considerau un d’os mosicos mas influyents d’a historia d’o blues, por ixo yera mundialment conoixiu como ‘O rei d’o blues‘.

Fillo de dos treballadors d’una plantación de cotón de Misisipi empecipió a suya carrera mosical gravando por o siello RPM Records de Los Ángeles. Tamién fació fama como disc jockey en Memphis, do se ganó a embotada de ‘Beale Street Blues Boy‘, que mas tarde s’abreviaría como B.B. King. Entre os anyos cinquanta escayeixió un d’os nombres mas importants d’o ‘Rhythm and Blues’ con titols que siempre mezclaban l’amor y a sensualidat: ‘You know I love you’, ‘You upset me baby’, ‘Please love me’ u ‘Sweet little angel’.

Dimpués de sinyar por o siello ABC-Paramount Records B.B. King empecipió a obtener os suyos millors exitos. Primero vendría un d’os suyos albums mas aclapaus, ‘Live at the Regal‘, gravau en o Regal Theater de Chicago en 1964. Lo seguirían cantas como ‘The thrill is gone‘, ‘To know you is to love you‘ y ‘I like to live the love‘. Un d’os discos mas conoixius en a suya zaguera etapa fue ‘Deuces wild‘, publicau o 1997. Bi intervinioron quantos mosicos d’o pop y d’o rock como Van Morrison, Elton John, os Rolling Stones y Eric Clapton, entre atros. Con l’album ‘Riding with the king‘, en 2000, King aconsiguió o Grammy como millor disco de l’anyo.

Siempre Lucille

O mosico americano ye considerau un d’os millors guitarristas d’a historia. Introdució solos de guitarra basaus en cuerdas dobladas y introdució ‘vibratos’ que influirían practicament en totz os guitarristas de blues que vendrían dimpués. Siempre se dirichió a la suya guitarra como ‘Lucille‘, en honor a una anecdota. Ista explica que entre una actuación en Arkansas un indendio obligó a desaloixar o recinto. King, manimenos, tornó adintro a recuperar a suya guitarra y estió amanau a morir. Mas tarde sabió que l’incendio l’heban provocau dos hombres que s’heban peleyau por una muller. Ista se diciba Lucille.

En o vidio, un concierto integro que B.B. King fació en 2011 en The Royal Albert Hall.

Fuent: http://www.vilaweb.cat/noticia/4306275/20150515/blues-plora-bb-king.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.