O brote d’ebola ya ha feito 887 muertes, seguntes a OMS

O relichioso espanyol que ha contrahiu o virus d'ebola en Liberia será repatriau pa sozmeter-se a tractamiento

Virus d'ebola. Foto: Centers for Disease Control and Prevention

Virus d’ebola. Foto: Centers for Disease Control and Prevention

Dende o mes de febrero, 887 personas ha muerto en o mundo a causa d’o virus d’ebola, seguntes a Organización Mundial d’a Salut (OMS). As victimas s’han concentrau en quatro países de l’Africa occidental: Guinea, Liberia, Sierra Leone y Nicheria. En total, i hai mas de 1.600 personas infectadas.

Entre os afectaus, i hai un relichioso espanyol, Miguel Pajares, que dimpués d’haber estau diagnosticau d’a malotía será tresladau t’o estau espanyol pa recibir tractamiento. Dica ahiere se trobaba isolau en o Hespital Saint Joseph de Monrovia, a capital de Liberia.

Seguntes ha informau l’achencia EFE, o gubierno espanyol ha anunciau que iniciará o protocolo de repatriación y ha insistiu que os risgos de posible contachio son muit baixos. O mosén espanyol, de 75 anyos y orichinario de Toledo, ye miembro d’a ONG Juan Ciudad, d’a Orden de Sant Chuan de Dios.

Amás de Pajares, s’ha repatriau dos personas mas por ista mesma causa. Son dos cooperants norteamericanos que tamién contrahioron o virus d’Ebola en Liberia y actualment se troban hespitalizaus en Atlanta (Estaus Unius). Totz dos han recibiu un tractamiento experimental que podría tener efectos positivos en os enfermos, seguntes explica iste reportache d’a cadena norteamericana CNN.

Aduya economica

O Banco Mundial ha anunciau que destinará 200 millons de dolars (arredol de 150 millons d’euros) pa aduyar d’emerchencia os países de l’Africa occidental a contener o brote d’ebola. Os diners s’entregarán a os gubiernos d’os quatro países afectaus y a l’Organización Mundial d’a Salut (OMS).

Sin tractamiento

Actualment no i hai garra tractamiento u vacuna pa combatir o virus d’ebola. A os pacients hespitalizaus les suministran liquidos por vía intravenosa pa aturar a deshidratación y tamién antibioticos contra as infeccions. Tot y que l’Ebola no tienga una cura, os pacients tienen mas posibilidatz de sobrevivir si reciben tractamiento luego. Manimenos, o brote actual d’a malotía saca a vida d’o 50% – 60% d’os infectaus.

O virus se contachia a traviés d’o contacto con sangre u qualsiquier atro fluiu corporal infectau.

Dende 1976

O virus d’ebola estió identificau por primer vez en 1976 en o norte d’o Zaire (l’actual Republica Democratica d’o Congo). Dende allora dica 2013 s’heba infectau menos de 1.000 personas cada anyo, pero en 2014 ha superau ista cifra.

Fuent: http://www.vilaweb.cat/noticia/4206593/20140806/brot-debola-887-morts-loms.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.