O CAI Santiago busca tranquilidat y Helios una mica d’oxichén ta remanir en División d’Honor

En Primera División femenina, School Zaragoza y CAI Santiago tienen chornada de descanso, mientres que Helios encara un doble enfrentamiento en Catalunya.

Jorge Cardona, Alberto Luño y Enrique Ruiz, d'o CAI Santiago (Foto: Comunicación Tenis de Mesa)

Totz dos equipos aragoneses que compiten en a División d’Honor de tenis de mesa, o CAI Santiago y o C.N. Helios, encaran iste cabo de semana una nueva chornada de liga, que será doble en o caso d’os heliofilos, ya que aprofitan o suyo desplazamiento a tierras gallegas ta enfrentar-se con o Liceo Vilagarcía (Pontevedra) y con o Club d’o Mar (A Corunya).

Se tracta de dos trobadas a priori complicadas, pero lo conchunto azulón parte con l’obchectivo d’aconseguir a o menos una victoria ta mantener a distancia con os suyos encorredors en a zona baixa d’a tabla, que s’ha pretau en as zagueras semanas. A expedición aragonesa, componida por Alfonso Beamonte, Marcelo Toledo y Javier Montero, visita o sabado a o Liceo Vilagarcía, un rival directo por a remanencia que encara ocupa a zaguera plaza d’o grupo a causa d’a suya mala actuación en a primera tornada, pero que acumula dos triumfos continos dimpués d’o fichaxe d’o catalán Ramón Mampel, ex palista de Súper División que forma agora un potent equipo chunto a o ruso Serguei Nigeruk y os gallegos Monroy y Pereiro.

O domingo, Helios se medirá a o quadro corunyés d’o Club d’o Mar, o tercer clasificau d’o grupo que conta con un terceto muit compensau, componiu por o veterano chugador chino Zhao Quiang y os chirmans Enseñat.

D’atra man, o CAI Santiago recibe o sabado (17.00 horas) a o conchunto ilerdense d’o Artimos Borges en un duelgo crucial ta trobar a tranquilidat de cara a la remanencia. Os caístas tienen dos victorias de colchón sobre a zona de baixada, por o que o triumfo debant d’o Borges, que ye debantzaguer, le metería en buena posición t’aconseguir l’obchectivo, sobre tot tenendo en cuenta que ya ha chugau en a segunda tornada con totz dos primers clasificaus. Una redota, manimenos, ficaría a o CAI en o grupo de cinco u seis equipos que luitan por privar os tres puestos de baixada.

O conchunto royet aliniará un terceto de raso aragonés, formau por Jorge Cardona, Alberto Luño y Enrique Ruiz, que tendrán enfrent a José Luis Andrade, Oriol Mir y David González.

En Primera División femenina, School Zaragoza y CAI Santiago tienen chornada de descanso, mientres que Helios encara un doble enfrentamiento en Catalunya debant de totz dos solos equipos a os quasl aconsiguió bater en a primera tornada, o Suris Calella y o Foment Deportiu Cassanenc. L’obchectivo con o que viachan Laura Ciriano, Ainhoa Antunez y Estela Valer ye o de repetir as victorias y distanciar-se en a clasificación de totz dos rivals.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.