O calentamiento global s’engalte as zagueras cheleras d’o Pirineu

A suya superficie ha quedau reducida a 160,4 hectarias en entrar-se-ne un 87,6 % en o zaguer sieglo y medio

Chelera d'a Maladeta. Foto: Gubierno d'Aragón

Chelera d’a Maladeta. Foto: Gubierno d’Aragón

O calentamiento global ye engaltindo as zagueras cheleras d’o Pirineo uescano, as luengas de chelo mas meridionals d’Europa y as solas existents en a peninsula Iberica: han perdiu un 87,6 % d’a suya superficie –siet uitenas partes- dende que, a mitat d’o sieglo XIX, a final d’a ‘chicota edat d’o chelo’, iniciada dimpués d’a Edat Meya, coincidise con a fase alchida d’a Revolución industrial. A mitat d’o chelo desapareixió antes de 1980 y tres quartenas partes d’o que en quedó s’esfumó en os siet lustros siguients.

As cheleras de Uesca son especialment sensibles a un problema global como ye o d’o calentamiento”, explica Fernando Lampre, cheografo y president d’o Patronato d’o Monumento Natural d’as Cheleras Pirinencas, creyau por o Gubierno d’Aragón en 1990.  De feito, as suyas perdas superan con claridat a las d’atras zonas d’Europa como os Alpes, o retroceso d’as suyas luengas de chelo dende mitat d’o sieglo XIX s’estima en un 40%.

Ixe diferent comportamiento revela “a gran sensibilidat d’as cheleras pirenencas a o calentamiento global y a suya situación limite en o contexto cheografico d’a cordillera”, manimenos que os alpinos presientan condicions menos desfavorables t’a suya conservación como estar orientaus t’o norte y ubicaus a altarias superiors a os 4.000 metros.

“En sieglo y medio solament i ha habiu anyos de paralización y de retroceso”

As cheleras no tienen salvación. “No han creixiu brenca en sieglo y medio. Solament i ha habiu anyos de paralización y de retroceso”, explica. “Ta que abanzasen caldría que a nieu se chelase sobre ellas y remanise, con hibiernos muit humedos y veranos frescos”, apunta. As abundants nevadas hibernals de 2013 y 2014 solament privoron que menguasen. Manimenos, dende ellas prencipioron dos d’os tres anyos, de conchunta con 2011, mas calidos dende que n’existen datos.

En 2012 sobreviviban diez cheleras que sumaban una extensión de 160,4 hectarias, seguntes os datos d’o Departamento de Desenrollo Rural y Sostenibilidat d’o Gubierno d’Aragón. S’extendeban en un aria de 90 kilometros que incluye os macizos de Balaitús u Moros, Perdiguero-Cabrioules, Vignemale u Comachibosa, Infierno, Mont Perdiu u Tres Serols, a Munia, Posets u Llardana y Maladeta-Aneto. Dende mitat d’os anyos 70 ha caito d’o listau luengas ubicadas en os tres primers y en as tucas de Cregüeña y de Llosás u Coronas.

O chelera d’a Maladeta, en a Ribagorza, conserva una superficie de 23,58 hectarias dimpués de menguar un 15 % en un lustro. En 1991 superaba o meyo millón de metros quadraus. O suyo espesor ha plegau a entrar-se-ne en tres metros en un solo anyo iste mesmo decenio, regresión que supera con claridat o d’o Monte Perdiu, que ha plegau a superar-ne os siet en un exercicio. “En cheneral, conservan un espesor d’uns 30 metros, quan en os anyos 80 n’aconseguiban os 60”, anota Lampre.

O cambeo climatico ha elevau dica os 3.000 metros d’altitut a isoterma d’os zero graus en ista zaguera zona d’a cordillera, seguntes as estimacions de l’Instituto Pirenenco d’Ecolochía, o que suposa una obvia dificultat ta que as nieus remaneixcan por baixo d’ixa linia. Quadros similars ha feito que a chelera d’a Paúl, en Posets, haiga perdiu tres quartenas partes d’a suya extensión dende 1980, que a de l’Aneto se haiga visto reducida en un 54 % en ixe mesmo periodo u que a d’o Mont Perdiu se’n haiga deixau un 24 %.

“A sola receta ye intentar salvar a planeta, que los incluye”

“As cheleras son desapareixendo, sobre tot, por o cambio climatico”, explica Lampre, que matiza que “a Tierra ha teniu ciclos de glaciación y de fusión d’o chelo, pero con o calentamiento global hemos accelerau o proceso”.

A sola receta t’o cudiau d’as cheleras sería ir totz a una ta salvar a planeta, que los incluye”, adhibe, antes d’anotar que as luengas de chelo “tornarán a las montanyas, como s’han iu y han tornau atras veces, o que no ye claro ye que o ser humano vaiga a existir ta veyer-lo”.

Os zaguers reductos de cheleras d’a Europa central y a meridional –abundan en l’aria nordica y Islandia- se’n troban, amás de en o Pirineu y en os Alpes, en os Apeninos y en o Caucaso.

A cheolochía ha permitiu constatar cómo fa 40.000 anyos cheleras pirinencas como a de Benás superaban os 500 metros d’espesor mientres atros aconseguiban os 30 kilometros de longaria.

Fuent: http://www.eldiario.es/aragon/sociedad/calentamiento-engulle-ultimos-glaciares-Pirineo_0_492401639.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.