O Campus de Uesca fa o suyo 40eno cabo d’anyo

D'os menos de 70 alumnos que bi heba en o curso 1972-1973, agora bi estudean quasi 3000 personas

Escuela Politecnica Superior de Uesca (Foto: UZ)

Escuela Politecnica Superior de Uesca (Foto: UZ)

O Campus de Uesca fa iste curso o suyo 40eno cabo d’anyo. A Universidat de Zaragoza i tien presencia dende o curso 1972-1973 quan se bi integró a Escuela Normal de Mayestros, en prener caracter universitario os suyos estudios a radiz d’a Lei Cheneral d’Amostranza de 1970. Sisanta y siet estudiants se i matriculoron t’a part d’alavez en as especialidatz de sciencias y sciencias humanas d’o nuevo plan formativo d’a que sería dende alavez Escuela Universitaria d’o Profesorau d’Amostranza Cheneral Basica. En os dos cursos venients continarían posando-se os alazetz d’o futuro campus con a creyación d’o Colechio Universitario – que ufriría os estudios de Medecina y Filosofía y Letras- y con a constitución d’a Escuela d’Incheniería Tecnica- que integraba en a Universidat de Zaragoza o titol de Sciencias Quimicas d’a conoixida como Universidat Laboral- Agora, quasi 3000 estudiants d’una docena de titulacions, y cinco centros, distribuyius en ueito edificios que bi ha por toda a ciudat, fa que Uesca entera siga un campus universitario.

Diferents actividatz – exposicions, charradas, mesas redondas,… – revisarán mientres o curso o revilcar, en o zaguer tercio d’o sieglo XX, d’a vida universitaria en Uesca, que heba desapareixiu en 1845, en zarrar a Universidat de Uesca. Dende que a Universidat de Zaragoza prencipiase o proceso de descentralización en 1992, bi ha habiu quatre vicerrectors d’iste Campus uescano:  José María Nasarre, Ana Castelló, Pilar Bolea y José Domingo Dueñas.

En l’actualidat, o Campus de Uesca, mantiene a suya dedicación que teneba en primeras de formación d’educadors y s’ha especializau en os estudios agrarios y meyoambientals, en as sciencias d’a salut, as sciencias de l’esporte y os estudios interpresarials y de l’administración. Ufre 11 graus universitarios, o segundo ciclo d’Inchenier Agronomo, quatre masters oficials y ueito titols propios de postgrau. Antimás ufre estudios de idiomas dependients d’o Centro de Luengas Modernas d’a Universidat de Zaragoza y o programa formativo ta mayors d’a Universidat d’a Experiencia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.