O Canto a la Libertat de Labordeta no será himno d’Aragón

As Cortes d’Aragón, con os votos d’o PP y PAR, han refusau a la fin prener en consideración a Iniciativa Popular refirmada por más de 24.000 aragoneses que demandaba que a conoixida canta de José Antonio Labordeta estase nombrada himno oficial d’Aragón

A la fin, o Canto a la Libertat de José Antonio Labordeta no será himno oficial d’Aragón. O Partiu Popular y o Partiu Aragonés han votau en contra d’a iniciativa popular que demandaba valurar que a canta d’o cantautor sustituiga a l’actual himno, de 1978. A iniciativa heba estau refirmada con más de 24.000 sinyadas de aragoneses, debant d’as 15.000 que caleban ta que se prenese en consideración en as Cortes.

Os dos partius que han votau en contra lo han chustificau asegurando que “no ye l’inte de cambiar garra d’os sinyals d’Aragón”, en parolas d’o portavoz d’o PP Ricardo Canals. Manimenos, sí que han coincidiu en que “encara que no siga himno oficial, continará estando l’himno popular”, como ha dito dende o PAR, Jesús Blasco. En ista linia, han remerau as manifestacions autonomistas d’as anyadas 70 y as anti trasvase d’as zaguers anyadas a on que siempre se cantada l’himno d’iste cantautor aragonés.

O resultau d’a votación, a on que se decidiba si mereixeba a pena debatir a iniciativa de cambiar l’himno, no ha feito goi ni a la oposición ni a los miembros d’a promotora que yeran entre o publico en o palacio de l’Alchafaría. Istos zaguers han pretau a cantar o estribillo en conoixer o resultau como muestra de refús.

Emilio  Gastón, ex Chusticia d’Aragón y portavoz debnat d’a Camara d’a promotora d’a proposa, no ha dandaliau en amostrar-se penau debant d’ista decisión. En a suya opinión “no se yera charrando de ideyolochía, sino d’una canta que fa parti d’a banda sonora de totz os aragoneses y que empondera lo que ye ista tierra”. “Recenta lo que ye Aragón y tot lo que ha regalau ista tierra a lo mundo”, ha indicau.

Fuent: Aragón2.com.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.