O cartel d’a Semana Santa baixoaragonesa se decidirá por concurso

Bi habrá un unico premio de 800 euros por as retalladas en o presupuesto.

Andorrano tanyendo o bomboO cartel d’a Semana Santa d’a Ruta d’o Tambor y o Bombo baixoaragonesa se tornará a decidir, por novena anyada, por concurso. En ista edición, as bases son as mesmas, encara que o numer de premiaus se reduz pasando d’os tres d’anteriors anyadas a nomás uno, qui recibirá un premio de 800 euros.

A decisión de baixar o presupuesto se prenió en as chornadas de convivencia que se facioron en marzo en Albalat de l’Arcebispe. Tamién se i decidió de fer un nuevo certamen fotografico d’a ruta, que as suyas bases se ferán publicas proximament.

Os cartels, que habrán de tener unas midas de 48 x 68 cm, habrán de estar disenyaus en colors azulas, moradas y negras, caracteristicas d’os vestuaches d’a ruta. Habrán de apareixer-ie os municipios que fan a ruta – Albalat de l’Arcebispe, Alcanyiz, Alcorisa, Andorra, Calanda, Ixar, A Puebla d’Ixar, Sant Per de Calanda y Urreya de Gayén- y calar-ie a Semana Santa d’a Ruta, d’o Tambor y Bombo, a declaración d’intrés turistico nacional y o logotipo d’a ruta. Os requisitos completos se pueden consultar en a web d’a ruta. Os treballos s’habrán de presentar en o Concello de Urreya de Gayén antis d’o 20 d’aviento.

En anteriors edicions s’han recibiu entre 15 y 30 cartels de muitos puestos d’Aragón y de difuera. O cartel ganador de l’anyada pasada, obra d’os andorranos Edgar Bes y Almudena Bielsa, estió antimás a imachen esleixida por a ONCE ta fer o cupón d’o pasau 14 de marzo.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.