O catalogo online de Fundación Goya amuestra Los desastres de la Guerra

En 2013 se fan 150 anyadas d'a I edición de Los desastres de la Guerra por a Reyal Academia de Bellas Artes de Sant Fernando de Madrit

Una d'as estampas d'os desastres d'a guerra

Una d’as estampas d’os desastres d’a guerra

Los desastres de la Guerra, de Francisco de Goya, ya son disponibles en a pachina web d’a Fundación Goya en Aragón. Asinas s’enamplan as seccions d’o suyo catalogo online con ista serie completa formada por 82 estampas. Antimás se publican os 64 debuixos paratorios d’as mesmas, lo que proporciona una completa anvista de totz os desastres d’a guerra. Asinas mesmo coincide con o 150 cabo d’anyo d’a I edición deLos desastres de la Guerra por a Reyal Academia de Bellas Artes de Sant Fernando de Madrit.

Ye una faina que se ye fendo gracias a un alcuerdo de colaboración entre a Fundación Goya en Aragón y a Fundación Telefonica. Ista unión tien como obchetivo treballar de conchunta en enamplar o catalogo que se puet viyer a traviés d’a web www.fundaciongoyaenaragon.es. D’ista traza tamién se i han adhibiu, antimás de Los desastres de la guerra, atras piezas como las series de Estampas relichiosas, Copias de Velázquez y Grabaus sueltos.

Atras seccions d’a pachina web que se han iu adhibindo en os zaguers meses son una relación d’os Premios Aragón – Goya daus por o Gubierno d’Aragón dende l’anyada 1996 dica agora y un alpartau adedicau a las zaguers atribucions a Francisco de Goya aintro d’o catalogo online d’a obra de Goya.

Tamién se ferán actividatz t’o Club d’amigos. A venient será una visita t’a Galería Carolina Rojo o miercols 13, a on que se celebra a exposición Pensar el arte, de DIana Larrea. Astí s’amuestran os treballos d’ista artista en l’anyada 2008, y entre ells se troba a serie Equus asinus, relacionada con a obra de Goya a on que se viyen os defectos y vicios d’ixas envueltas.

Fundación Goya en Aragón prencipió en 2009 as fainas de documentación y redacción que calen ta confeccionar un catalogo completo d’a obra d’o pintor Francisco de Goya. Ta meter-lo a l’alcance d’o mayor numer posible d’usuarios s’editó en formato dichital, d’acceso libre y de baldes. Se publica en castellano y en anglés. Os treballos de documentación, corrección y traducción d’a resta de series de grabaus y debuixos continan con l’obchetivo de contar con un repertorio completo d’a obra de Goya en o rete.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.