O Centro Ambiental de l’Ebro ubre as suyas puertas en aviento

Se bi organizarán toda mena d'actividatz, exposicions y investigacions.

Chent en barcas por l'Ebro (Foto: Zaragoza Turismo)

Chent en barcas por l'Ebro (Foto: Zaragoza Turismo)

O Centro Ambiental de l’Ebro s’ubrirá t’o publico o venient mes d’aviento con l’obchetivo de espardir o patrimonio natural d’a ciudat de Zaragoza. Iste Centro ye en l’edificio Europa que, d’antesmás acullió as siedes d’a Candidatura Olimpica Zaragoza Pirineus 2012 y d’ExpoPaisaches 2014.

O 2 d’aviento, a exposición “Zaragoza Verda y Azula: as riberas de l’Ebro” servirá de debantadera t’ nuevo espacio d’exposicions. Ista muestra preba de “dar a conoixer, espardir y disfrutar d’o patrimonio natural d’a ciudat, con ficacio en os cursos fluvials y o rete d’espacios verdes. Ta marzo bi habrá una atra exposición d’una triga d’as millors fotos  d’as siet convocatorias d’o premio de fotografía sobre os galachos de Chuslibol.

Mientres os cabos de semana se ferán recorrius ta descubrir y conoixer a naturaleza zaragozana. Ista actividat prencipiará iste mesmo domingo con una cursa clamada “Descubre a naturaleza de l’Ebro d’agüerro”. Se i ferá una mesa informativa y una gambada de baldes prencipiando dende o Centro Ambiental.

Ta l’anyada venient prencipiarán a fer-se-ie cursos de toda mena: agricultura ecolochica, floricultura, monitors de tiempo libre…  L’asociación Ebronautas incluyirá entre as suyas actividatz una visita t’o centro. Tamién prencipiará a funcionar un programa d’hortals urbanos en colaboración con interpresas y asociacions d’a ciudat. Antimás, tamién a Universidat de Zaragoza ye previsto que faiga alcuerdos ta fer-ie investigacions.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.