O Centro d’Interpretación d’o Balcón de Sant Lazaro ubre as suyas puertas

O centro se podrá visitar nomás os cabos de semana

Balcón de Sant LazaroO centro d’Interpretación d’o Balcón de Sant Lazaro, en Zaragoza, ubrirá una atra vegada as suyas puertas iste viernes 5 de chulio, coincidindo con os actos de remeranza d’a Guerra contra os franceses que se ferán mientres lo cabo de semana. O centro se podrá visitar nomás os cabos de semana en horario de 11:00 a 14:00 sabado y domingo y de 18:00 a 21:00 nomás o sabado. A dentrada tien un pre d’un euro.
Jerónimo Blasco, conseller de Cultura d’o Concello de Zaragoza ha cifrau en más de 20.000 as visitas que ha recibiu lo centro dende que se ubrise entre 2008 y 2011. “Istas cifras indican l’intrés que dispiertan istos repuis entre o vecinamen d’a ciudat, ya que son cifras amanadas a las que reciben de media beluns d’os museus d’a Ruta de Caesaraugusta como as Termas u o Puerto Fluvial”. Ta prebar d’ixamplar l’intrés d’o centro, cada anyada se i amostrarán repuis arqueolochicos d’a epoca que se puedan meter en un edificio sin climatizar.
O Concello reubre asinas un centro que, seguntes sinyalan dende a oposición y atros sectors, leva dende a suya ubridura sin un prochecto museistico. Tampoco no s’ha descartau, por agora, fer un concurso t’adchudicar a chestión de l’espacio.
Dende as asociacions de vecins, y tamién dende a colla municipal d’o PP, s’han presentau diferents ideyas ta emplir de contenius o centro. Ye o caso d’os vecins d’o Rabal qui demanadan que o centro “incluiga contenius audiovisuals que expliquen a evolución d’a marguin cucha y o papel alazetal de l’antigo convento mientres os Sitios”. L’Asociación Cultural d’os Sitios, d’atra man, proposa que se i faya un memorial sobre o fosal de Macanaz, a on que morioron 10.000 esfensors d’a ciudat en a “guerra d’o francés”. Dende o PP apuestan por un prochecto que contienga imachens historicas d’os vicos y a on que bi haiga una serie de pinturas de vistas historicas d’a ciudat.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.