O chuez decreta a libertat condicional d’Uribetxeberria por ‘razons humanitarias’

L'informe d'a clinica forense de l'Audiencia espanyola recomendaba tractar-lo d'o cancer que pate enzarrau en a prisión

O chuez central de vichilancia penitenciaria de l’Audiencia espanyola, José Luis Castro, acceptó ahiere a petición de meter en libertat por ‘razons humanitarias’ a o preso Josu Uribetxeberria Bolinaga dimpués de reunir-se con ell en l’Hespital Donostia. A salida d’a prisión no será decamín porque caldrá asperar a la interlocutoría formal y que no se presenten recursos en contra.

A decisión la ha presa contra a recomendación de l’informe d’a clinica forense de l’Audiencia espanyola sobre l’estau de salut de Iosu Uribetxeberria, que concluyiba que o preso vasco puede estar tractau d’o cancer terminal en a prisión y que no fa falta que sía ingresau en l’hespital. O estudeo pericial medico estió entregau fa una semana a o chuez central de vichilancia penitenciaria, José Luis Castro, y a o fiscal Pedro Rubira, que ha asumiu a causa en cuenta d’o fiscal chefe Javier Zaragoza. L’informe contradiciba o de l’Hespital Donosti de Sant Sebastián.

Fa dos semanas, a secretaría cheneral espanyola d’Institucions Penitenciarias concedió o tercer grau a Uribetxeberria, dimpués de l’informe de l’hespital de Sant Sebastián, que constataba que o preso sufre un cancer terminal y irreversible y que i hai un 90% de probabilidat de que se muera antes d’un anyo. Ista curta asperanza de vida supera de largo os parametros fixaus por o gubierno espanyol en 2000 ta empecipiar un proceso d’excarcelación.

A concesión d’o tercer grau, con que o preso ha d’ir t’a prisión a adormir, yera o trango previo a la decisión sobre a libertat condicional, que recaye en o chuez de l’Audiencia.

Fuent: http://www.vilaweb.cat/noticia/4036904/20120831/jutge-decreta-llibertat-condicional-duribetxeberria-raons-humanitaries.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.