O chuez imposa fianza de 66 millons d’euros a Victorino Alonso por o caso d’a espelunga de Chaves

Un chuez de Uesca desestima o recurso de Victorino Alonso contra a fianza. Se le acusa d'a destrucción d'a espelunga de Chaves

Estau d'Espelunga Chaves

Estau d’a espelunga de Chaves (Foto: Apudepa)

O chudgau d’Instrucción numero 3 de Uesca ha notificau un auto d’o chuez de 14 d’abril de 2015 por medio d’o qual, acullindo as alegacions presentadas por Apudepa, desestima o recurso de Victorino Alonso contra a fianza imposada de 66 millons d’euros por o caso d’a espelunga de Chaves.

Apudepa alegó contra dito recurso por entender que l’auto d’obridura de chuicio oral yera irrecurrible tamién en relación con a fianza, y que, conforme a la lechislación vichent en materia d’enchuiciamiento criminal, a fixación d’a fianza yera de tot adequada, parando cuenta que o chuez tien plena potestat pa imposar-la.

Asinas pues, o chuez fa firme l’auto por medio d’o qual, amás d’a obridura d’o chuicio oral, s’ordinó o deposito, en o plazo d’una audiencia, d’una fianza pa fer cara a la responsabilidat civil derivada d’a destrucción d’a espelunga. A quantía fixada s’adequa plenament a la petición realizada por Apudepa, que contempla pa la valoración d’os danyos l’informe d’o feneciu director d’o Museu de Uesca Vicente Baldellou.

Tamién o Gubierno d’Aragón y o ministerio fiscal han defendiu a imposición d’a fianza sinyalada. Apudepa quiere amostrar a suya satisfacción por iste “nuevo trango en a depuración d’as responsabilidatz respective a un d’os mas brutals atentaus contra o patrimonio arqueolochico”.

Fuent: http://arainfo.org/2015/04/el-juez-impone-fianza-de-66-millones-de-euros-a-victorino-alonso-por-el-caso-de-la-cueva-de-chaves/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.