O chuez imposa una fianza de 8,1 millons d’euros ta Urdangarín y Torres

Os dos imputaus tienen agora cinco días habils -dende o momento que se comunica a decisión- ta fer efectivos os diners que les empacharía a os dos d'ir a la garchola

urdangarinO duque de Palma y o suyo exsocio, Diego Torres, habrán de depositar una fianza de 8,1 millons d’euros en o plazo habil de cinco días dende que se les notifique. Asinas l’ha comunicau o chuez que instruye o caso Nóos, José Castro, atendendo a las demandas d’a Fiscalía y d’o Sindicato Manos Limpias.

En l’auto, de 500 folios, sinyala que pueden responder de traza subsidiaria, de traza que se puedan repartir o pago d’a mesma u bien belún d’os afectaus podría pagar l’importe total d’a fianza. Si no lo fan, se les empararían totz os biens dica cubrir a quantía d’a fianza que se les ha imposau.

Antiparti, o machistrau les demanda que le comuniquen si tienen antecedents penals por si hesen d’adhibir l’agravant de reincidencia. Ya o pasau 21 de noviembre, a Fiscalía Anticorrupción presentó debant d’o Chudgau d’Instrucción numero 3 de Palma o suyo escrito de responsabilidat civil en o qual se demandaba a cantidat de 8.189.448 euros t’os dos y as interpresas administradas por totz dos imputaus y a traviés d’as que esbarroron fondos publicos y privaus que obtenioron con l’Instituto Nóos.

O sindicato Manos Limpias, como acusación popular, presentó en o suyo día un escrito de 30 pachinas en o qual demandaba tamién a mesma cantidat y explicaba en dito documento a traza en que  “se disbrazó a Nóos con a mascaruta de l’animo de lucro”, tot y que “se creyó especificament” ta acceder a distintos convenios de colaboración con as comunidatz autonomas de Balears y Valencia y d’ista traza defraudar os diners publicos obtenius.

As acusacions desglosan a suya demanda de fianza en os 1,2 millons d’euros que costó o convenio t’a celebración d’o primer Illes Balears Forum (2005); os 1,085 millons d’o segundo (2006); os 1.044.000 millons de cadaguna d’as tres edicions feitas de l’evento Valencia Summit, y os 382.000 euros que percibió Nóos d’a Sociedat Chestora t’a Imachen Estratechica y Promocional d’a Comunidat Valenciana, alavez dirichida por o dirichent d’o PP Esteban González Pons, por a celebración d’uns Chuegos Europeus que nunca no se facioron.

Tanto Urdangarin como Diego Torres presentoron un escrito d’alegacions contra a fianza de 8,1 millone d’euros. En ell s’explicaba que o papel d’o duque de Palma yera merament representativo en Nóos y esfienden que os contractos sinyaus yeran “correctos”. Pascual Vives afirmó que si o duque de Palma heba de fer frent a ixa cantidat no podría responder con ella en “efectivo”.

Fuent: http://www.aragon2.net/n-20537-502-juez_impone_fianza_81_millones_euros_para_Urdangarin_Torres

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.