O chuez ordena prisión incondicional pa Luis Bárcenas

L'acusación publica considera que ha aumentau o risque de fuga porque levó fondos a os EEUU y Uruguai dende as suyas cuentas no bloqueyadas

BárcenasO chuez de l’Audiencia espanyola Pablo Ruz ordinó ahiere prisión incondicional y sin fianza pa l’extresorero d’o PP Luis Bárcenas. D’iste modo acceptaba a mida solicitada por a fiscalía y una d’as acusacions populars. O machistrau lo resolvió dimpués d’haber interrogau a Bárcenas entre dos horas y tamién a la suya muller, Rosalía Iglesias, por o nuevo delito de que estioron acusaus: haber simulau a venda de quadros con l’obchectivo d’emblanqueixer amán de 560.000 euros. A una quartalada p’as ueito de l’atardeixer, Bárcenas saliba de l’Audiencia espanyola ent’a prisión de Soto de Real.

Seguntes l’acusación publica, ha aumentau o risque de fuga de Bárcenas parando cuenta en que dende Suiza s’heba informau que heba levau fondos a os EEUU y a Uruguai dende as suyas cuentas no bloqueyadas.

Interlocutoria d’o chuez

En una interlocutoría de vintiquatro pachinas, o chuez de l’Audiencia espanyola decreta l’ingreso en prisión por os delitos contra l’administración publica, contra Hicienda, blanqueu de capital, estafa procesal en grau de tentativa y falsedat en documento mercantil.

O chuez aseguró que en a declaración d’ahiere Bárcenas heba ufriu una explicación parcial, inconsistent y manifestament insuficient sobre o conchunto d’actividatz y operacions patrimonials en que interveniba a traviés d’as suyas cuentas en Suiza. Y encara adhibió que as suyas parolas a ormino entraban en contradicción con as comunicacions internas d’os chestors bancarios suizos.

O risque de fuga, seguntes o chuez, proveniba d’a ‘penalidat asociada a os ilicitos penals imputaus’ y de ‘a elevada previsión de responsabilidat pecuniaria derivada d’os delitos obchecto d’imputación’. Isto fació que a fiscalía pedise una fianza de 28 millons d’euros a Bárcenas por responsabilidat civil.

Unatro argumento chudicial a favor de l’engarcholamiento ye que a instrucción ya ye en un punto abanzau y que Bárcenas tien medios economicos pa escapar-se. Amás, remarcó que yera patrimonio de ‘dificil intervención chudicial’.

Y, encara, seguntes Ruz,  Bárcenas ha d’ingresar en a prisión pa privar de que altere as prebas relacionadas con os delitos imputaus. ‘A capacidat de l’encausau d’acceder -bien ell, bien por medio de tercers- a las fuents de prebas u d’influir sobre mas encausaus, testigos u peritos u qui pueda estar-ne s’ha de tener como real y no merament anecdotica’, dició.

L’advogau de Bárcenas diz que a fuga ye imposible

L’advogau de Bárcenas, Alfonso Trallero, considera imposible que o suyo client pueda escapar-se u destruir prebas. ‘Tien una fisionomía masiau conoixida’, dició a os periodistas. Seguntes ell, ha teniu quatro anyos ta destruir prebas y no l’ha feito. Trallero dició que no entendeba o cambeo d’opinión d’a fiscalía y abanzó que recurriría contra a decisión d’o chuez Ruz y pediría que l’encausau quedase en libertat sin fianza. Antiparti, dició que Bárcenas heba encaixau bien a noticia porque teneba ‘muita fortaleza’, pero que yera desconcertau.

Fuent: http://www.vilaweb.cat/noticia/4129932/20130628/jutge-ordena-preso-incondicional-luis-barcenas.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.