O Colectivo Pedalea convoca a una marcha ciclista contra o nuevo reglamento de circulación

Consideran que as nuevas midas que preba d'aprebar a DGT frenarán l'emplego d'a bicicleta y meterán en periglo a os suyos usuarios. Existe un gran refuse social a la nueva normativa

cartel28ApekeO Colectivo Pedalea organiza iste domingo una marcha en bicicleta en Zaragoza con prencipio en a Pza. Sant Francisco a las 12 h., con a fin d’oponer-se a la nueva normativa d’o Reglamento Cheneral de Circulación que quiere aprebar a DGT y que contiene midas que o colectivo ciclista considera perchudicials t’a promoción d’a bicicleta y t’a propia seguridat d’as ciclistas.

Destaca entre istas midas a obligación de portar casco en as zonas urbanas. O colectivo confirma que ista obligación en os tasos países a on existe ha disminuyiu o numero de ciclistas mesmo en un 50%, o qual chenera un aumento d’o numero d’accidents en estar menos ciclistas en as carreras.

Atra mida a la que s’oposan ye a obligación de circular por a parte dreita d’o carril y no por o centro, mesmo en carreras d’un solo carril, o que podría provocar enantamientos periglosos d’os coches sin respectar a distancia de seguridat d’1,5 metros y provocar atropellos, amás d’accidents por obriduras de puertas de coches aparcaus.

En a nota de prensa, iste colectivo tamién comenta mas midas perchudicials como a equiparación d’as bicicletas con os coches en o rechimen sancionador sin parar cuenta en o periglo que cada vehíclo puede chenerar, asinas como a obligatoriedat de portar casco en vías verdas u os diferents permisos a demandar ta organizar marchas ciclistas.

Pedalea sinyala que a reforma ye contradictoria, en argumentar que diz protecher y promocionar a la bicicleta, pero antiparti, a posible reducción d’o numero de ciclistas en as carreras puyaría a siniestralidat, seguntes mesmo datos d’a propia DGT.

Ista reforma ha estau refusada por asociacions d’usuarios, Federación Espanyola de Ciclismo, asociacions de fabricants y marcas (mesmo, qui fabrican y venden cascos), concellos como os de Barcelona, Valencia, Sevilla, Zaragoza, Uesca, Bilbau, Murcia, Vitoria, Burgos, Sant Sebastián, Palma de Mallorca, Valladolit entre atros, muitos gubernaus por o propio PP.

A favor d’a normativa pareixen nomás posicionar-se bellas companyías de seguros y bellas asociacions d’automobilistas. Seguntes o colectivo, preban de frenar a caíta d’emplego d’os coches, que son en baixada en tot l’Estau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.