O Colectivo Pedalea fa un clamamiento a os y as ciclistas a tomar o Pº Independencia de Zaragoza

Será o viernes en protesta por l'aumento de pinyoras a ciclistas debiu a l'aplicación d'a sentencia d'o TSChA y pa reclamar midas pa favoreixer l'uso ciclista d'as calzadas

protesta-pedalea-por-independencia-300x211O Colectivo Pedalea convoca a una protesta en a calzada d’o Paseu Independencia de Zaragoza iste viernes 26 de 18 a 20 h. en protesta por l’aplicación d’a sentencia d’o Tribunal Superior de Chusticia de Aragón que viedaba circular a las bicicletas no nomás por as ceras, sino tamién por todas as carreras piatonals y parques, que ha teniu como conseqüencia un amiro de pinyoras por parte d’a Policía Local.

O colectivo ha reclamau a Carmen Dueso, consellera de Movilidat d’a ciudat, que realice midas pa afavorir a circulación de bicicletas por as calzadas. O Pº Independencia, do se va a borrar o carril bici que s’heba debuixau en a cera, ye un d’os puntos mas conflictivos entre autos y bicis. Qualques ciclistas se considera acosadas por os autos que i circulan. Se clama asinas mesmo por a instalación de semaforos en ambar pa bicis en dito paseu.

O colectivo ha recibiu un fascal de pinyoras de ciudadanos por ir en bici en carreras piatonals, mesmo antes que no a sentencia d’o tribunal superior haiga entrau en vigor. En istas carreras, se constata que seguntes ista normativa, no se puede ir en bicicleta pero sí a-saber-las personas i pasa con l’auto.

Pedalea s’ha dirichiu enta Carlos Pérez Anadón, consellero d’Urbanismo, responsable d’a Policía Local zaragozana y un d’os futuribles sucesors de Juan Alberto Belloch, pa que explanique qué ordens ha dau a o cuerpo policial zaragozano respective a l’aplicación d’a sentencia.

Todas as entidatz y partius politicos presents en l’Observatorio d’a Bicicleta reclamoron que mientres bella semana se fese una labor informativa d’a “nueva” normativa en as ceras, no pas en carreras piatonals do no existe alternativa. Ye posible que o nuevo Reglamento Cheneral de Circulación que ye parando a Dirección Cheneral de Trafico, autorice l’uso d’istas arias.

Respective a o espectacular l’aumento de pinyoras istos días, o colectivo denuncia que “Sería penible que ista persecución respondense a una orden politica, pues ixo sería una error que podría dilapidar o esfuerzo de promoción d’a bici d’os zaguers anyos, por una sentencia basada en una normativa de 1990, quan as bicicletas simplament no existiban pa os lechisladors”.

Ye urchent construir carrils bici en as avenidas, pues en ellas o volumen y a intensidat d’o trafico disuade a mils de ciclistas a fer servir a calzada. Mas que mas en o Casco Historico, cal permitir l’acceso de bicicletas a zonas ‘piatonals’ que habrían de pasar a considerar-se ‘no motorizadas’. Y l’aplicación d’a sentencia no debe convertir-se en una mena de ‘caza a o ciclista’ por parte d’a Policía Local”, concluyen.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.