O comité d’AUZSA proposa de no cobrar a os usuarios mientres a francha horaria d’a vaga

Contina o conflicto entre AUZSA y a suya plantilla por as 153 personas forachitadas. O comité demanda no cobrar a os y as usuarias en as franchas d'atures

Foto: AraInfo

Foto: AraInfo

O comité d’interpresa d’AUZSA pedirá a o Concello de Zaragoza autorización pa que dica o día 13 d’octubre -zaguer día d’as Fiestas d’o Pilar- os conductors en a francha horaria de 12.30 y 15.30 horas -a francha d’os atures- no cobren billete ni atro titol de transporte pa ir en autobús. Ista proposa incluye o “correspondient desconto por vaga a o treballador” y pide que no se le abonen a la interpresa os kilometros realizaus en ixa francha horaria. En caso d’aprebación y autorización municipal dica o día 13 d’octubre s’ampraría servicio normal de l’autobús urbano.

Dende o 21 d’octubre os atures indefinius serán de luns a viernes, de 8.00 a 10.00 horas y de 20.00 a 22.00 horas. Y o día 29, coincidindo con o chuicio en o TSJA i habrá ature total entre toda a chornada.

Istes han estau os prencipals acuerdos presos hue -quinceno día de vaga con un seguimiento atra vegada d’o 100% d’a plantilla– por o comité d’interpresa d’AUZSA en o pleno celebrau ista tarde.

Asinas mesmo, o comité informa que hue, a la salida d’as 15.30 horas, ha detectau que a luz exterior de dezaga de frenau en 50 autobuses no funcionaba, “manimenos a interpresa ha obligau a os conductors a salir en ixas condicions a amprar servicio”. Iste feito se meterá maitín en conoixencia de Servicios Publicos d’o Concello.

Amás, o comité mandará un escrito a Servicios Publicos d’o Concello pa que aclareixca a suya postura como parte afectada en a causa ubierta en os chudgaus por os despius d’as y os 153 treballadors. “U pide estar coaduyant de l’actora y por tanto esfiende o despiu nulo u improcedent u coaduya con AUZSA y por tanto esfiende o despiu obchectivo. No veyemos que procesalment culla postura intermedia pa soltar a la sala a suya proposa d’alcuerdo. A demanda de despiu ya ye interpuesta. A moción de CHA ye por incumplimiento de contracto” sinyala o comité.

Por o que fa a las venients movilizacions, o comité recuerda que mantiene a concentración prevista pa iste chueves, 10 d’octubre a las 19.30 horas en a plaza d’Espanya de Zaragoza y a d’o venient 17 en a plaza Aragón an que amás se realizará una Asamblea cheneral.

Pa lo 29 d’octubre, calendata prevista pa la realización d’o chuicio, i hai convocadas dos movilizacions. A primera en a siede d’o TSJA (Coso 1) a las 9.00 horas d’o maitín, y a las 19.00 horas a manifestación dende a plaza d’Aragón dica a plaza d’o Pilar.

Fuent: http://arainfo.org/2013/10/el-comite-de-auzsa-propone-no-cobrar-a-los-usuarios-durante-la-franja-horaria-de-la-huelga/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.