O comité de FCC Parques y Chardins exiche l’achuste de mas de trenta personas y no descarta movilizacions

O comité d'interpresa considera que con l'ixample d'o contracto puede achustar-se a 30 treballadors mas

Protesta d'a plantilla en a pasada vaga. Foto: Arainfo

Protesta d’a plantilla en a pasada vaga. Foto: Arainfo

O comité d’interpresa de FCC parques y chardins ha criticó durament ahiere o nuevo ixample d’o contracto de poda d’arbolau por no ir en correlación de nuevos puestos de treballo y l’ha qualificau como “a negociación entre o PSOE y a interpresa pa meter fin a la pasada vaga”.

Dende o comité denuncian que l’ixample d’1,5 millons d’euros anyals no pueden derivar solament en once puestos de treballo. “Con 1,5 millons d’euros anuals pa la poda s’habrían d’achustar mas de 30 puestos de treballo asinas como a maquinaria y medios necesarios pa realizar as labors contractadas”, han criticau.

As y os treballadors aseveran que, seguntes os datos aportaus por o gubierno socialista, “uns quatrocientos mil euros irían pa man d’obra y medios y a resta con destín actualment no chustificau”.

En iste sentiu, o comité d’interpresa exiche decamín l’achuste de mas de trenta personas nuevas y o desglose publico d’a relación d’arbols sobre os quals se va a actuar.

Amás dende o comité denuncian que dica a calendata solament s’ha achustau a dos operarios pa la realización d’istas labors. “Iste maitín han prencipiau as labors d’o nuevo contracto y solament i heba dos treballadors nuevos”, subrayan.

Informan tamién que iste maitín no i heba once operarios como dició o gubierno sino que han estau realizando istas labors quatro personas, solament dos d’os quals son treballadors nuevos.

O comité contina criticando que iste aumento presupuestario incrementa o presupuesto d’a contrata en un 15%, porcentache que se diminuyó en a nueva licitación, entre que as y os treballadors han visto reduciu os chornals en un 5% y o servicio conta con menos medios y personal pa prestar o servicio.

“Somos debant d’un trescole de diners publicos a mans privadas en qual solament perdemos treballadors y ciudadanos” asevera o comité d’interpresa. “Iste feito refleixa clarament que o gubierno socialista treballa nomás pa os poders empresarials deixando a la deriva a os vecins y vecinas de Zaragoza” critican as y os treballadors.

En alusión a la falta de personal y a la nueva partida economica tornan a denunciar, como lo vienen fendo en os zaguers anyos, que “una vegada mas o gubierno socialista ha perdiu unatra oportunidat de creyar emplego y realizar unas politicas por y pa la ciudat de Zaragoza”.

O comité d’interpresa se reunirá o proximo chueves de maitins a on analisarán detalladament o nuevo ixample de poda y valurarán as midas a realizar en esfensa d’a creyación de nuevos puestos de treballo. “Analisaremos o nuevo contracto de poda y no descartamos movilizacions en os proximos días con o solo obchectivo que se creyen nuevos puestos de treballo y no se regalen os diners publicos que pagamos entre totz y todas as ciudadanas de Zaragoza”, apuntan.

O president d’o comité d’interpresa se reunió d’urchencia ahiere con o president de l’Observatorio d’as Contratas, Raúl Ariza, pa analisar o nuevo contracto y a falta de personal designau pa lo mesmo, asinas como pa informar que s’ha incumpliu l’alcuerdo de participación vecinal y de treballadors en a realización d’os nuevos pliegos y l’alcuerdo d’o concello pa que os aumentos de partida presupuestaria en as contratas fuesen en correlación de nuevos puestos de treballo.

O comité va a solicitar reunir-se con totz os grupos politicos d’o consistorio y informan que iste mesmo maitín, dimpués de veyer que as enqüestas dan posibilidat de gubierno a ‘Zaragoza en Comúntamién han solicitau una reunión con ista coalición.

As y os treballadors tienen previsto informar a os grupos d’a situación actual en parques y chardins y solicitarán un compromís pa que o nuevo gubierno analise o estau d’a contrata y revise o nuevo ixample guarenciando que o millón y meyo d’euros aumentaus conllevan mas de trenta puestos de treballo.

“Asperamos que o proximo gubierno de Zaragoza achugue firmement por a creyación d’emplego y a calidat en os servicios publicos y por tanto revise l’actual contrata de parques y chardines an que solament perdemos treballadors y ciudadanos d’a ciudat”, inciden.

“Somos vivindo, con o responsable Blasco a o mando, a pior chestión en l’aria de parques y chardins que nunca no heba viviu a ciudat” apostillan, pa finalizar denunciando que o consellero Blasco “no nomás ye malfurriando diners publicos sino que deixa hipotecada a chestión de parques y chardins pa lo venient gubierno”.

IU pide explicacions

Por a suya parte, o representant d’o grupo municipal d’IU en a Comisión de Medio Ambient y president de l’Observatorio d’as Contratas, Raúl Ariza, ha rechistrau una petición de compareixencia d’o consellero Jerónimo Blasco pa que faiga una explinacación y desglose publico sobre l’aprebación en Gubierno de l’ixample d’o contracto de parques y chardins en 1,5 millons d’euros.

En iste sentiu, ha denunciau que “no ye etico ni estetico ixamplar contratas sin garra participación y tant amán d’as eleccions”. IU sinyala que, a priori, no se chustifica tant alta cantidat: “Con l’ixample d’1,5 millons en a contrata de FCC podemos pagar 20 chornals anyals de Jerónimo Blasco u 40 nuevos puestos de treballo pa lo mantenimiento en os parques”.

Raúl Ariza indica que “iste nuevo ixample no guarda relación con os once nuevos puestos de treballo anunciaus, por o que suposaría vulnerar l’alcuerdo por o qual cada incremento en a dotación economica d’as contratas heban de venir apareixaus con incremento proporcional de puestos de treballo pa cubrir as nuevas necesidatz”.

En iste sentiu, o edil d’IU ha anunciau que tamién interpelará a Jerónimo Blasco pa conoixer o esconto real, dimpués de l’anunciau por o propio consellero entre a zaguera Comisión debant d’as deficiencias contrastadas por os servicios tecnicos en as zonas 1 y 2, y l’informe d’Izquierda Unida tresladau en ixa sesión. “En función d’a información obtenida en a proxima Comisión decidiremos o conteniu d’una moción en o zaguer pleno d’a lechislatura con l’obchectivo de paralizar con caracter immediato l’ixample de dito contracto”, ha subrayau Ariza.

Asinas mesmo, Izquierda Unida interpelará en a Comisión d’Hicienda a Fernando Gimeno pa conoixer “si iste ixample s’achusta a la legalidat u se debe a atros acuerdos que o grupo municipal d’IU desconoixe”, amás de solicitar l’informe real y total sobre a execución d’as sancions a FCC.

Fuent: http://arainfo.org/2015/04/el-comite-de-fcc-parques-y-jardines-exige-la-contratacion-de-mas-de-treinta-personas-y-no-descarta-movilizaciones/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.