O Concello d’Auguaviva apreba por unanimidat a moción contra l’entibo en l’Alcherez

Por unanimidat s'aprebó una moción en o Concello d'Auguaviva en contra de l'entibo en o río Alcherez

embalse-del-rio-Bergantes-300x160O Concello d’Auguaviva aprebó en sesión plenaria o pasau sabado, 6 de chulio de 2013, a moción que a semana pasada heba rechistrau a plataforma vecinal “El Bergantes no se toca” solicitando un posicionamiento claro en contra d’a construcción de l’entibo en l’Alcherez.

A decisión estió presa por unanimidat de totz os concellers actualment en o cargo, tres d’o PSOE y dos d’o PAR. En a moción presentada s’insta a requerir a la Confederación Hidrografica de l’Ebro -CHE- a paralización d’o proceso de tramitación de l’expedient d’o prochecto de l’entibo en o río Alcherez y a exichir a o Ministerio d’Agricultura, Alimentación y Medio Ambient descartar o prochecto por no estar una actuación de caracter sostenible, vulnerando normativas europeas como a Directiva Marco de l’Augua y a Directiva d’Habitats y causando afeccions innecesarias y irreversibles a l’entorno natural.

Amás, se solicita que, en caso de caler a regulación y prevención de flumens en o río Alcherez, s’estudien y metan en practica midas razonables, sensatas, economicas y respectuosas con o medio ambient, como os nuevos aliviaders de l’entibo de Calanda chunto a la execución d’o recreiximiento de Santolea y una millor chestión d’os flumens. Se pide tamién a creyación d’una mesa de treballo con institucions publicas y usuarios d’a cuenca de l’Alcherez pa la elaboración d’un ‘Contracto con o río’.

Finalment se solicita que, amás de dar treslau de l’alcuerdo a la plataforma “El Bergantes no se toca”, se faiga d’igual traza a las siguients institucions: Comarca d’o Baixo Aragón, Diputación de Teruel, Diputación de Castellón, Presidenta d’o Gubierno d’Aragón, President d’a Generalitat Valenciana, Confederación Hidrografica de l’Ebro, Ministerio d’Agricultura, Alimentación y Medio Ambient y Gabinete d’o President d’o Gubierno d’o Estau.

Dende a plataforma “El Bergantes no se toca”, se fa una excelent valuración d’iste alcuerdo, “ya que se consideraba como un trango muit important en o proceso de paralización d’o prochecto de l’entibo d’Auguaviva. En os venients diyas se dará entrada a ista moción en atros concellos d’a comarca y de toda a cuenca de l’Alcherez”.

Fuent: http://arainfo.org/2013/07/el-ayuntamiento-de-aguaviva-aprueba-por-unanimidad-la-mocion-contra-la-presa-en-el-bergantes/

Una rispuesta a O Concello d’Auguaviva apreba por unanimidat a moción contra l’entibo en l’Alcherez

  1. Pingback: O Concello d’Auguaviva apreba por unanimidat a moción contra l’entibo en l’Alcherez | Arredol | La Franja

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.