O concello de Burgos diz que continará con as obras d’o bulevar de Gamonal

A mayoría d'o PP empacha aturar definitivament as obras. Ista tarde i hai convocadas concentracions en solidaridat con Gamonal en Zaragoza, Uesca y Teruel

Protesta debant d'o concello de Burgos. Foto: @UJCEBurgos

Protesta debant d’o concello de Burgos. Foto: @UJCEBurgos

O pleno de hue d’o concello de Burgos ha decidiu de continar con as obras d’o bulevar d’o vico de Gamonal pese a la oposición ciudadana que ha chenerau una ola de solidaridat en tot o Estau espanyol contra a execución d’iste bulevar.

O concello burgalés ha refusau as mocions presentadas por PSOE y UPyD que demandaban l’ature definitivo d’as obras, gracias a la mayoría d’o PP, mientres que ha aprebau unatra d’o PP en favor d’aturar temporalment os treballos.

Arredol de 4.000 personas s’han concentrau debant d’o concello mientres o pleno, chilando contra l’alcalde, Javier Lacalle, y demandando-le que salise t’a balconada a dar-ne explicacions.

Dimpués de meses de reivindicacions vecinals en contra d’as obras d’o bulevar, a falta de voluntat de negociar por parte de l’alcalde y a situación de crisi existent en iste vico obrero y en a resta d’o Estau esclatoron en disturbios que rematoron con barracalas, contenedors cremaus y estricallos en bancos. Se producioron qualques detenius, cinco d’ells son en prisión preventiva baixo fianza de 3.000 euros.

Movilizacions en solidaridat

Tanimientres continan as movilizacions en a resta d’o Estau espanyol en solidaridat con Gamonal y os detenius, que empecipioron o pasau mierques. En Madrit se tornoron a producir disturbios y enfrontinamientos entre os manifestants y a policía espanyola como ya pasó o mierques, diya con 14 personas detenidas, entre ellas un bombero de servicio.

En Aragón hue se realizarán concentracions en solidaridat con o vico de Gamonal en Zaragoza (20 h. Paraninfo), Uesca (20 h., Pza. Zaragoza) y Teruel (19 h. Subdelegación d’o Gubierno espanyol).

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.