O Concello de Candarenas incluye en o padrón a os habitants de Sieso de Chaca

Quasi un decenio dimpués, istas familias que aportan una parte importante d'os ninos y ninas d'a escuela d'iste municipio rural, han visto satisfeita a suya reclamación

Foto: Aitor Sánchez Domeque

Foto: Aitor Sánchez Domeque

O Concello de Candarenas ha incluiu en o padrón a las y os habitants de Sieso de Chaca. Dimpués de nueu anyos de reivindicar iste dreito, istas familias que aportan una parte important d’os ninos y ninas d’a escuela d’iste municipio rural, han visto satisfeita a suya reclamación.

O deputau Jorge Luis Bail y atros integrants d’Alto Aragón en Común s’han reuniu con l’alcalde d’a localidat, Primitivo Grasa, en quantas ocasions entre os pasaus meses pa concretar ista solución.

Luis, que inició os contactos estando parlamentario de Podemos-Alto Aragón en Común, y los concluyó como candidato d’Unius Podemos en Común, ha reclamau midas efectivas que permitan consolidar a población rural y favoreixcan a instalación de nuevos habitants que dinamicen as zonas menos pobladas d’Aragón.

“O no empadronamiento de personas que residen en un municipio ye una situación irregular, que incumple a lechislación”, sinyala Jorge Luis, y que amás “entorpece a posibilidat de l’asentamiento de nuevos pobladors en zonas, como ista, que sufren con fuerza a despoblación”.

O medio rural amenista chent”, ha precisau Jorge Luis, recordando a importancia que a plataforma a que perteneixe atorga a o desenrollo rural, insistindo amás en a “obligación” que todas as administracions metan os medios pa fer posible a plegada de personas que puedan estar motor de desenrollo”, que faigan chovens as vals, y faciliten o mantenimiento, “y mesmo l’ixample”, d’escuelas y atros servicios publicos.

O deputau uescano ha recordau que 5 d’os 12 ninos y ninas d’a escuela de Candarenas son fillos d’as familias que reclamaban o empadronamiento, y que ixe numero s’incrementará, previsiblement, a l’atro curso.

“L’Alto Aragón -explica Jorge Luis-, tiene, amás d’a necesidat, potencialidatz pa acullir a chovens intresaus por a vida en os lugars, que colaboren en a dinamización d’istes territorios”. En iste sentiu ha recordau experiencias d’asentamiento de nuevos pobladors ya existents, y que han permitiu, por eixemplo, que en a val d’a Guarga exista una escuela, y que se desenrollen en ell iniciativas economicas que le den vida y que se recupere, de vez, una parte d’o patrimonio d’a zona.

Jorge Luis replegaba a queixa d’as familias de Sieso de Chaca en una visita realizada a ista val, l’abril pasau, con l’obchectivo de conoixer de primera man a situación d’os servicios publicos en a zona y pa conoixer as dificultatz que se presientan pa consolidar población en arias rurals de l’Alto Aragón.

As y os habitants d’ista localidat denunciaban allora que levaban quasi un decenio tractando infructuosament que o suyo municipio les reconoixese como vecins y vecinas incorporando-les a o suyo padrón, “incumplindo a lei 7/1985 d’o 2 d’abril que regula dito proceso, y as recomendacions d’o Chusticia d’Aragón”.

Jorge Luis se reuniba posteriorment, dica en tres ocasions con l’alcalde pa, entre atras qüestions, abordar iste problema y conoixer as razons d’ista actuación irregular por parte d’o consistorio. O edil se comprometió allora debant d’o deputau uescano a resolver ista situación largament enquistada.

Fuent: http://arainfo.org/el-ayuntamiento-de-caldearenas-incluye-en-el-padron-a-los-habitantes-de-sieso-de-chaca/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.