O Concello de Fraga enceta os preparativos t’o Día d’a Faldeta

O Día d'a Faldeta ye una Fiesta d'Intrés Turistico en Aragón que cada anyo y mientras o mes d'abril se celebra en a capital d'a Cinca Baixa y que iste anyo tendrá puesto o domingo 22.

L'obchectivo d'a primera reunión yera meter a disposición os recursos d'as tres concellalías y aconseguir dar mayor empente a ista fiesta. (Foto: comarcas.es)

A concellal delegada de Fiestas, Pilar Martínez, o concellal delegau de Turismo, Juan Castañ y a concellal delegada de Cultura, Carmen Querol, se reunioron ahiere en o Concello de Fraga en a primera trobada previa a la celebración d’o Día d’a Faldeta 2012. Una Fiesta d’Intrés Turistico en Aragón que cada anyo y mientras o mes d’abril se celebra en a capital d’a Cinca Baixa y que iste anyo tendrá puesto o domingo 22.

A reunión de treballo, en a qual prenioron parte tamién tecnicos d’as tres delegacións, se celebra con l’obchectivo de meter a disposición os recursos d’as tres concellalías y aconseguir asinas dar un mayor empente a una fiesta que l’anyo pasau vivió un punto d’inflexión en o suya devenir en celebrar-se por vez primera sin coincidir con os actos d’o 23 d’Abril, Día d’Aragón, y en o domingo mas proximo a dita calendata. Con ista modificación s’aconsiguió, seguntes o Concello, fer creixer l’atractivo d’o Día d’a Faldeta difuera d’o termin municipal en no fer coincidir l’evento con atras celebracións y brindar a o tiempo a posibilidat d’asistir a todas aquellas personas intresadas en a fiesta y que residen en comunidatz autonomas en as quals o 23 d’Abril no ye festivo. “Se celebrarán mas reunions, hue hemos abordau a mayoría d’os temas, pero i habrá atras trobadas”, explica Martínez.

Iste anyo, a festividat se coordina con atros eventos previstos mientras o mes d’Abril con a finalidat de conformar un calandario festivo unico que ranca o 15 d’Abril con o Día d’a Bicicleta y finaliza o 29 de dito mes con a tradicional trobada de Bolilleras. Amás, o 21 d’abril s’organiza en o Castiello de Fraga o desfile de trayes tipicos que corre a cargo d’a expierta en o trayé tradicional fragatín, Manolita Labrador, o 22 tienen puesto os actos centrals y o 23 se celebra a o tiempo o Día d’Aragón y o Día d’o Libro.

A istes actos, y asinas se concretará en venients reunións, se les sumarán atros dica conformar un completo programa que, destaca Juan Castañ, “convierte a fiesta en una ferramienta de desembolique economico porque se tracta de embolicar a quanta mas chent millor”. Y adhibe que “no ye solament un día de fiesta t’a zona, ye una oportunidat ta restauradors, comercios y totz aquells negocios vinculaus d’una u unatra traza con o turismo”. L’anyo pasau, unas 3.000 personas participoron en una festividat que a o mesmo tiempo que aspira a meter un anyo mas en valor o patrimonio cultural d’a Ciudat. “D’o que se tracta ye que participe a mayor cantidat de chent posible y que s’aprofite a oportunidat d’iste festello”, explica Querol.

Fuent: http://www.comarcas.es/index.php/mod.noticias/mem.detalle/idnoticia.6677/relcategoria./chk.8dc48c5cea046f3575b5d67258bb770a.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.