O concello de Grisel esviella una caseta de boveda en o mont de La Ciesma

A fin ye que faiga honra como recurso turistico d'o lugar

P1240561En istos primers dias d’o mes d’otubre, o Concello de Grisel ye rematando l’esvielle d’una caseta situada en o mont de La Ciesma y con a fin de que faiga honra como recurso turistico de o lugar.

L’edificio ye una caseta redonda que fa parti d’una excepcional colla de 27 construccions de cobexo en o mon de La Ciesma clamadas en a redolada “casillas de pico” debiu a la suya chocant traza de rematar por o cobalto. D’ista mena de casetas se’n conoxen belatros exemplos en lugars como Añón y Vera de Moncayo y tamién en bels municipios de a redolada de o Campo de Borxa. Istas casetas de La Ciesma ya estión inventariadas y estudiadas por l’Asociación Cultural La Diezma que, l’anyo 2003, publicó un libro en o que se replegan un camatón de datos historicos y etnoloxicos relacionaus con ellas.

O siñal constructivo más destacau d’istas casetas ye o suyo tellau en forma de capucheta punchuda y que, en o suyo interior, amaga una clau central clamada en o lugar “talón”. A caseta que ha estau esviellada ye a que fa o lumero 12 d’as 27 conoxidas en o mon y se troba a 770 m d’altaria, una mica baxo a plana d’a tuca de o mon y en una suya versant noreste. Dende ixe puesto ye posible esfrutar d’una ambiesta sobrebuena d’a plana de l’Ebro y, solo que puyando unos metros, tamién d’una estendillada imachen de o Moncayo.

A rehabilitación de a caseta ha consistiu en remeter as perdas de bardo y piedras de a cara exterior de a cubierta, más que más de o suyo costau dreito, aprofeitando as mesmas piedras que yeran cayitas y belatras que s’han pillau en a costeras que bi son aman. Tamién s’han rebozau una miqueta las paretz con bardo feito de a tierra d’o mesmo puesto, pretando-la bien entre zaborro y zaborro ta que quedase o mas firme posible. En o suelo s’ha chitau una superficie de mortero de cal, de trazas que en dengún caso s’ha emplegau garra material muderno u estranio a la propia tecnica constructiva orixinal.

A restauradora encargada de a obra ha estau Cristina Alonso, que fa parti d’un estudio d’arquitectura con siede en Tarazona, a partir d’un cudiau informe que encluye un debantamient fidel de tot l’alzau d’a caseta. Antimas s’han instalau chunto a la caseta bellas variellas que han permitiu fotiar tot o proceso de restauracion de traza sistematica y, asinas, disposar d’una documentación completa de l’esvielle. Os piqueros que han feito a obra son chovens profesionals de lugars de a redolada.

Istos días se ye acotraziando lo camín que, dende os aerocheneradors de a tuca d’o mon, plegará dica la caseta esviellada. Tamién ye previsto colocar un atril chunto a la caseta y una mesa en la tuca de o mon con informacion ta que todas as personas que i pleguen puedan conoxer a valor d’istas chiquetas construccions.
Encara que por agora solo s’ha actuau sobre ista caseta, l’alcalde de Grisel Javier Martínez ye plateyando-se continar con a recuperación de belatras en una venient enchaquia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.