O Concello de Ricla leva meses reclamando un servicio sanitario adequau

Dende iste concello chunto a atros municipios d'a redolada, demandan una millora d'os servicios de salut

concello riclaFa uns meses l’alcalde de Ricla, Francisco Romeo, ninvió una carta t’o Consello de Salut de L’Almunia de donya Godina informando “sobre as deficiencias existents en o consultorio medico, en o qual, dimpués d’una reunión entre a concellera de sanidat d’o concello y o personal sanitario, se detectó que o personal (medico y ATS) resultaba insuficient ta cubrir as necesidatz de Ricla, con una población de 3.200 habitants, que en verano se duplica”.

Elvira Fiances, concellera de sanidat, remera que “ista queixa la encetó de traza solitaria Ricla, pero dimpués comprendiemos que as deficiencias no nomás afectaban a o nuestro municipio, soque tamién a ixos atros con os que compartimos servicios: Calatorau, Alpartil y Almonecir, y con os que prencipiemos una actividat conchunta ta buscar solucions a iste problema que tanto afecta a la población d’os quatro municipios”.

A concellera de Ricla remera que mientres o zaguer mes s’ha procediu a una replegada de sinyaturas, con una respuesta masiva, que se ferá plegar no nomás t’o Consello de Salut, soque tamién t’a Cherencia de Salut de conchunta con una carta, sinyada por os concellers de Sanidat d’os quatro lugars afectaus.

En dito escrito os municipios afectaus sinyalan que, “debant d’os zaguers feitos que venimos sufrindo como usuarios d’a Seguridat Social, ha caliu fer todas istas iniciativas: retalles de profesionals, compartir servicios d’ATS y pediatría entre lugars, inexistencia de pediatría en dos d’ells (Almonecir y Alpartil) y amás no se cubren as baixas con a immensa sobrecarga que ixo ye suposando”.

En a citada carta aseguran, asinas mesmo, no estar d’alcuerdo con o Plan d’Optimización de personal sanitario, ya que “suposa desatender un tema tant important como a salut y no se puede ixublidar que ista zona ye clau ta l’acullida de personal temporero que viene a treballar en a recullida d’a fruita, duplicando-se a población, o que no implica manimenos garra modificación en o numero de sanitarios”.

Fuent: http://arainfo.org/2013/02/el-ayuntamiento-de-ricla-lleva-meses-reclamando-un-servicio-sanitario-adecuado/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.