O Concello de Uesca se declara ‘Ciudat bilingüe: castellano-aragonés’

L'aragonés ye considerau ‘luenga propia’ en a capital altoaragonesa, que ha solicitau a la DGA o suyo reconoiximiento oficial como Ciudad bilingüe

29 enero, 2016 | Cultura | Autor: Arredol | Tweet

Foto: Concello de Uesca

Os amants d’a cultura y d’as luengas, pero sobre tot os vecins y vecinas de Uesca, son de norabuena. O pasau miercols, o suyo Concello, a iniciativa d’Aragón Sí Puede, que sumó os votos de Cambiar Uesca y PSOE, aprebó declarar-se ciudat bilingüe. Ista iniciativa reconoixe a l’aragonés como luenga propia, y suposa o emparo oficial ta todas aquellas personas que usan ista luenga, equiparando-la legalment a o castellano en o municipio.

En a exposición de motivos o Concello de Uesca explica que “l’aragonés ye a luenga historica tradicional y propia d’os territorios hue comprendius en a Comarca d’a Plana de Uesca. Fue usau de contino, como luenga charrada y escrita, tanto en os lugars d’a comarca como en a ciudat de Uesca”, y recorda l’articlo 7 d’o Estatuto aragonés vichent que diz: “As luengas y modalidatz lingüisticas propias d’Aragón constituyen una d’as manifestacions mas destacadas d’o patrimonio historico y cultural aragonés y una valor social de respecto, convivencia y entendimiento”, “Dengún no podrá estar discriminau por razón d’a luenga”.

Agora, o Concello de Uesca solicitará formalment que o Gubierno d’Aragón la incluiga como ‘zona de predominio d’a Luenga Aragonesa’, requisito legal imprescindible en a normativa churidica d’a DGA.

Tamién a Comarca d’a Plana de Uesca reconoixe a l’aragonés como luenga propia

O día anterior a ista declaración d’o Concello de Uesca como Ciudat bilingüe, a Comarca d’a Plana de Uesca aprebaba en similars condicions una declaración institucional solicitando a o Gubierno d’Aragón a suya inclusión como ‘zona de predominio d’a Luenga Aragonesa’.

Dende Aragón Sí Puede, impulsora d’a iniciativa, sinyalaban que “dimpués d’un durismo treballo y de superar mil obstaclos y trabetas hemos aconseguiu que a Comarca aprebe en o Pleno a nuestra Propuesta de Resolución presentada t’a solicitut formal a o Gubierno d’Aragón como zona de predominio d’a Luenga Aragonesa”, y concluiban afirmando que “dimpués de sieglos de ninguneo, l’aragonés empecipia a estar valorau y fomentau dende as institu30cions aragonesas”.