O Concello de Zaragoza insta a o Gubierno d’Aragón a dar una solución t’as mas de 22.000 becas de material escolar denegadas

O consistorio pide revisar y flexibilizar os criterios exichius, asinas como incluir midas de progresividat

Concello de Zaragoza (Foto: Andrés Gaspar)

Concello de Zaragoza (Foto: Andrés Gaspar)

L’equipo de gubierno d’o Concello de Zaragoza, a traviés de l’aria municipal d’Educación y Cultura, ha instau a o Gubierno d’Aragón a reconsiderar a resolución de concesión de becas escolars concedidas ta iste curso 2013–2014 y ufrir solucions a os mas de 22.000 estudiants que han solicitau aduya ta l’adquisición de material curricular y han quedau en lista d’aspera. En iste sentiu, s’ha pediu una revisión y flexibilización d’os criterios exichius, asinas como a inclusión de midas de progresividat que permitan a las familias solicitants con menos recursos l’acceso a istas aduyas.

“O que pedimos ye que as familias con menos recursos que n’han quedau difuera, a lo menos ellas, puedan obtener bella aduya”, recalcó o consellero d’Educación d’o Concello de Zaragoza, Jerónimo Blasco. “Somos convencius que o reparto que s’ha feito no guarancia o prencipio d’igualdat y de dreito a la educación y que muitas familias van a tener verdaders problemas ta que os escolars puedan adquirir ixe material curricular”, insistió.

Seguntes datos oficials, en Aragón s’han refusau y han quedau en lista d’aspera 33.588 solicitutz, 10.918 ta becas de minchador y 22.670 ta material escolar, mientres que s’han concediu menos d’a metat d’ixa cifra: 16.493 becas, 11.633 ta l’adquisición d’os libros de texto y 4.860 t’o servicio de minchador escolar.

“O proceso de desmantelamiento d’o sistema educativo publico en que pareixen encerrinaus os gubiernos central y autonomico pareixe no tener fin. Si en os dos zaguers anyos hemos asistiu a una dramatica diminución d’o profesorau, a un retalle historico en o desembolique de programas en centros educativos, a la puyada d’o numero de ratio en as aulas y a una infradotación d’as becas de minchador (solament se’n concede ya o 26% d’as solicitadas), iste nuevo retalle a o sistema d’aduyas suposa a debantzaguera pica contra un d’os mayors y mas importants pilars d’a nuestra sociedat como ye a educación”, se lamentó Jerónimo Blasco.

Amás de l’ixample d’aduyas a las familias en lista d’aspera, o Concello va a proposar a implantación de politicas de reutilización de material escolar en os centros educativos d’a ciudat, de tal forma que s’herede d’un curso ta unatro, con a substitución exclusiva d’aquell que se trobe en mal estau d’uso y conservación. “L’actual sistema de libros nuevos ye superfluo y inadequau en una sociedat que busca a racionalidat y a eficiencia d’o gasto”, advirtió o consellero d’Educación.

Fuent: http://www.cronicadearagon.es/wordpress/?p=44309

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.