O Concello de Zaragoza y a Universidat creyan una catedra t’o bienestar y a protección animal

Naix con os obchectivos de amillorar o bienestar d'os animals de companyia, y fer más facil a labor social que fan o Centro Municipal de Protección y os colectivos protectors

Mixín en a Uerva

Mixín en a Uerva

A vicerrectora de Transferencia y Innovación Tecnolochica d’a Universidat de Zaragoza, Pilar Zaragoza, y o conceller d’Cultura, Educación y Medio ambient, Jerónimo Blasco, han sinyau iste lunes un convenio de colaboración t’a creyación d’una “Catedra t’o fomento d’a protección y o bienestar animal“.

Seguntes os sinyants “a nueva catedra naixe con tres obchectivos chenerals. En primer puesto, contribuyir a amillorar o bienestar d’os animals de companyía, incluyindo-ie aspectos etolochicos, fisiolochicos y sanitarios”. Atro d’os obchectivos ye “fer más facil a faina social que fan as protectoras y en concreto lo Centro de Protección Municipal, contribuyindo a amillorar lo estau sanitario d’os animals que i replegan y a fer-les a esterilización ta privar que s’espardan masiau os animals asilvestraus.” Tamién servirá ta “refirmar a formación clinica de profesionals albeitars, qui serán un elemento clau d’a normativa de protección animal.”

As actividatz se articularán a traviés de quatre programas. Un, de control y saneamiento de mixins asilvestraus en a ciudat, atro d’esterilización de animals adoptaus en o Centro de Protección, asesorando a los suyos propietarios y fendo as intervencions que calgan, atro de refirme asistencial a personas con pocos recursos y un zaguer programa de practicas d’estudiants d’albeitar.

Con ista catedra, o Concello “fa un trango más en o suyo compromís por enantar en a protección, o bienestar y o cudiau d’os animals que viven en a ciudat. Dende que en 2011, prenese a chestión d’o Centro Municipal de Protección animal un nuevo concesionario y prencipiase a aplicar-se a politica de Sacrificio zero entre os animals replegaus, se han feito importants trangos en ixa endrecera.” O concello mete como eixemplos d’ixa politica “a modificación de l’Actual Ordenanza Municipal que regula tener animals y a suya convivencia en a ciudat, a creyación d’una Oficina Muncipal y d’un Consello Sectorial especifico de Protección Animal, o desembolique d’un prochecto de “Casas d’Acullida”, u os tallers y campanyas de concienciación contra o maltracto y o fomento de l’adopción, entre atra serie d’iniciativas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.