O Concello pinyora con 750 euros a l’Asociación Vecinal Puent Santiago por meter diez cartels en o vico

O Concello de Zaragoza sanciona a un miembro d'una asociación vecinal con 750 € por a colocación d'uns cartels informativos

Reivindicación vecinal. Foto: Arainfo

Reivindicación vecinal. Foto: Arainfo

O Concello de Zaragoza, a traviés d’a Policía Local, ha pinyorau con 750 euros a un miembro de l’Asociación Vecinal Puent Santiago por apegar diez cartels informativos -”grandaria folio y con celo en as quatro cantonadas”- en o que se convocaba a una manifestación autorizada ta reclamar a reposición d’o servicio d’autobuses en a zona norte de l’Actur, que o propio Concello ha suprimiu.

Ista vecinal recuerda, en una nota de prensa, que “quan o Gubierno de Zaragoza anunció que derogaba a Ordenanza Civica, clamada d’a ‘Botellada’, o concellero Gimeno declaró que: ‘Con tot ixo, s’abanza en l’armonización d’a normativa municipal, s’unifican criterios y procedimientos administrativos y se fomenta l’adequada convivencia y emplego d’os espacios publicos par parte d’a ciudadanía”. Pero os feitos contrimuestran tot lo contrario.

T’as asociacions vecinals d’o vico de l’Actur ista pinyora ye “un ataque represivo a la libertat de comunicación d’as asociacions que no tienen atro medio ta informar a os vecins y vecinas”. “En continas ocasions dende a FABZ hemos manifestau a necesidat de disposar d’espacios publicos d’información adequaus y suficients ta desembolicar a nuestra labor de difusión”, adhiben.

“Creyemos -contina la nota- que no se puede reprimir a o movimiento ciudadano por ista mena d’accions que de garra traza afectan a la convivencia y a o comportamiento d’os ciudadanos en o espacio publico d’a ciudat. O procedimiento utilizau por o Concello de Zaragoza tracta mas bien de prebar d’acallar as protestas d’as asociacions vecinals, en o suyo dreito a manifestar en a carrera as suyas reivindicacions sobre a reestructuración d’as linias d’autobuses”.

Antiparte, t’as AAVV “resulta sospeitoso que se pretenda de sancionar a un miembro d’una asociación vecinal por a colocación de cartels d’ambito informativo, mientres que a ciudat ye plepiada de cartels comercials y de toda mena. A conclusión ye que qualsiquier organización civil, vecinal  u cultural no va a poder dar información a la ciudadanía porque será sancionada u mesmo a nivel particular. Si se t’ha perdiu o can u o gato, u si ha desapareixiu una persona, ficancia, o Concello te foterá un lapo de dica 750 euros”.

“En suma, creyemos que istos feitos atentan contra os dreitos y libertatz d’as y os ciudadanos y que pretenden de sancionar a os colectivos socials. Son midas desproporcionadas, inchustas y abusivas y que pareixen mas bien obra d’un Estau policial. Y son midas que veyemos criticar por parte d’os politicos quan son en a oposición, pero que practican quan son gubernando. O que siempre s’ha dito: una doble vara de medir”, concluyen.

Fuent: http://arainfo.org/2013/12/el-ayuntamiento-multa-con-750-euros-a-la-asociacion-vecinal-puente-santiago-por-poner-diez-carteles-en-el-barrio/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.