O Concello suspende o procedimiento de concesión administrativa de La Romareda a o Reyal Zaragoza

Tamién se suspenden os procedimientos de licitación d'o contracto de mantenimiento d'os edificios municipals y as ofiertas t'as obras d'o Parque de Bombers nº4 en Casetas

Muñoz y Artigas mientres a rueda de prensa d'iste chueves. Foto: @arainfonoticias

Muñoz y Artigas mientres a rueda de prensa d’iste chueves. Foto: @arainfonoticias

O consellero d’Urbanismo y Sostenibilidat d’o Concello de Zaragoza, Pablo Muñoz, y a concellera delegada de Mobilidat y Medio Ambient, Teresa Artigas, han compareixiu en o maitín d’iste chueves en rueda de prensa ta dar cuenta d’os decretos con que s’han procediu a la suspensión d’os procedimientos administrativos de concesión d’o Estadio Municipal de La Romareda a o Reyal Zaragoza SAD, de licitación d’o contracto de mantenimiento integral y eficiencia enerchetica d’os edificios y instalacions municipals, y d’a presentación d’ofiertas t’as obras d’o futuro Parque de Bombers numero 4 de Casetas.

En totz os casos, a razón prencipal d’ista suspensión radica que o nuevo Gubierno municipal considera que resulta convenient o estudeo detallau d’istes tres expedients, “cadagún con as suyas peculiaridatz”, por quantos motivos, ha precisau Muñoz.

Os motivos son: “Por a necesidat d’o replanteyamiento d’os prochectos; porque o suyo inicio responde a alcuerdos que fuoron adoptaus por l’anterior gubierno municipal en periodo electoral y sin o debat necesario; y porque, por o suyo amonto economico, condicionan os presupuestos que l’Equipo de gubierno quiere empentar mientres a lechislatura”.

Estadio Municipal de La Romareda

En o caso de l’expedient administrativo ta l’atorgamiento d’a concesión administrativa d’o Estadio Municipal de La Romareda a o Reyal Zaragoza SAD, se suspende o procedimiento, deixando sin efecto o tramite d’información publica ta presentar alegacions, en que actualment se trobaba, mantenendo vichent a resta d’o conteniu de l’alcuerdo d’o consello de cherencia d’Urbanismo d’o pasau día 25 d’abril, que concluiba o proximo 16 de chulio.

A decisión s’adopta porque o gubierno actual pretende “conceder con total solidez as posibles conseqüencias que podrían asperar-se en o caso que o procedimiento en tramite concluise seguntes yera previsto, asinas como a posible existencia d’atras alternativas t’a chestión d’o campo de futbol”, ha explicau Muñoz.

En iste sentiu, iste maitín Pablo Muñoz s’ha reuniu con o Reyal Zaragoza ta comunicar-le a decisión y “prencipiar l’empento d’alternativas”. Dende Zaragoza en Común han afirmau que “iste verano prencipiarán as conversacions con a DChA, FEF y entidatz financieras ta que l’afición pueda desfrutar quanto antes d’a reforma”.

Entre a rueda de prensa, o consellero d’Urbanismo ha anunciau que, dimpués de l’ascenso a Segunda División B, o Club Esportivo Ebro ha solicitau fer servir o estadio de La Romareda en beluns d’os suyos partius.

Contracto de mantenimiento integral d’edificios municipals

Respective a la licitación d’o contracto de “Mantenimiento integral y eficiencia enerchetica d’edificios y instalacions d’o Concello de Zaragoza”, s’ha decidiu de suspender o plazo de presentación d’ofiertas por parte d’os licitadors, porque incide dreitament en as posibilidatz d’inversión municipal t’os proximos anyos.

A finalización d’o periodo de prorroga d’as contractas fació que o Concello de Zaragoza redactara uns nuevos pliegos de condicions, en que se primaba tanto o mantenimiento integral d’os 704 edificios como a eficiencia enerchetica d’as instalacions.

Os pliegos planteyaban un mantenimiento integral, ye dicir, que s’habrá d’atender a totz os aspectos que guarencian o funcionamiento d’edificios, amás d’as intervencions que amilloren a suya eficiencia enerchetica y que s’han estudiau edificio por edificio ta poder elaborar os pliegos. O pre de licitación que s’ha teniu en cuenta parte d’as cifras que son en vigor en l’actualidat, 6,1 millons d’euros, encara que s’estima como un pre de partida. En qualsiquier caso, o Equipo de Gubierno mete de manifiesto o suyo compromís con a eficiencia enerchetica, y se buscarán as alternativas mas convenients en iste sentiu t’os edificios municipals.

Parque de Bombers numero 4 de Casetas

Finalment, tamién se paraliza a licitación d’o prochecto de construcción d’o Parque de Bombers numero 4 de Casetas, o plazo de presentación d’ofiertas finalizaba o proximo 8 de chulio, tamién ta estudiar-lo detenidament dada a importancia d’a inversión prevista, que ascendeba a 2,2 millons d’euros.

Fuent: http://arainfo.org/2015/07/el-ayuntamiento-suspende-el-procedimiento-de-concesion-administrativa-de-la-romareda-al-real-zaragoza/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.