O concello zaragozano pretende incluyir un carril bici en a cera d’o Paseu Independencia

O concello de Zaragoza pretende pintar un carril bici en as ceras d'o Paseu Independencia. O Colectivo Pedalea refusa a mida y demanda a calzada como puesto natural t'a bicicleta

O concello de Zaragoza pareixe dispuesto a creyar un carril bici en as ceras d’o Paseu Independencia, en a parte mas amanada t’a calzada entre as tileras que n’i hai. Una decisión que de seguras creyará prou polemica.

Manimenos, antes se convocará a l’Observatorio d’a Bicicleta, organismo consultivo d’o concello y formau por diversos colectivos y tecnicos, ta debatir a proposa y debatir alternativas. Tamién se fablará con os hostelers que dan servicio en iste centrico paseu d’a capital aragonesa y que fan servir a cera ta meter veiladors, ocupando gran parte d’a mesma. D’ista traza, seguntes o Departamento de Servicios Publicos d’o concello, se pretenden evitar conflictos amugando l’espacio que piatons, ciclistas y autos han de fer servir.

Manimenos, o Colectivo Pedalea reclama a calzada como puesto natural d’a bicicleta, denunciando a falta de seguridat que muitos y muitas ciclistas sienten circulando por a mesma, declarando que “a excesiva circulación de bicicletas por as ceras ye a conseqüencia directa d’a falta de seguridat que muitas ciclistas sienten en a calzada”. Asinas mesmo, denuncian a falta de midas que o concello prene ta guaranciar a seguridat d’as bicicletas por a calzada, como o respecto d’a velocidat d’as “carreras 30” u a construcción de carrils bici en as grans avenidas.

Pedalea diz que “l’aturada d’o Plan Director d’a Bicicleta ye en sí mesmo una agresión a la seguridat de piatons y ciclistas d’ista ciudat”, metendo como eixemplo l’actuación municipal en iste paseu, una reforma que seguntes iste colectivo ciclista menaza a os piatons, refusando a ideya de que piatons y ciclistas compartan as ceras.

Amás Pedalea exiche asinas mesmo que “o concello cumpla con l’alcuerdo que alcanzó l’Observatorio d’a Bicicleta en marzo, ta que se prengan midas que faciliten a circulación de bicis por a calzada y no por a cera”. Tamién exiche a execución d’o “radiu” presupuesto municipal ta carrils bici de 2012.

Finalment, iste colectivo anima a la ciudadanalla a circular con a suya bicicleta por a calzada d’Independencia, con enchaquia d’o Diya Europeu Sin Autos, iste sabado 22 de setiembre de 18 a 19 h. A convocatoria “no ye una marcha en grupo, soque una cita en a que circular con libertat, respectando con exactitut as normas de trafico, y prou que, por a calzada, mientres o tiempo que cadagún deseye, entre as 6 y as 7 d’a tarde”, ta reclamar as calzadas tamién t’as bicicletas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.