O Consello d’a Choventut d’Aragón en periglo de desapareixer

O Consello d'a Choventut d'Aragón nomás recibirá 2.500 euros d'o gubierno aragonés ta 2013, seguntes o prochecto de Lei de presupuestos. Si no se modifica podría estar a fin d'a entidat

O Consello d’a Choventut d’Aragón (CJA) ha visto reduciu en o prochecto de Lei de presupuestos ta Aragón ta l’anyo 2013 a suya partida presupuestaria en un 96,6%. Asinas lo denuncia en una nota de prensa. O Consello, que arrocla a mas de 40 asociacions chovenils aragonesas, tien 2.500 euros d’asignación presupuestaria ta l’anyo venient.

O CJA, que por lei fa d’interlocutor entre a choventut aragonesa y as institucions, considera imposible mantener a suya estructura y actividatz con iste presupuesto, amás d’obligar a fer fuera a las dos treballadoras que tien a entidat. O presupuesto de 2012 yera de 70.000 euros y ya feba dificil o mantenimiento d’a entidat. Seguntes o CJA, o contexto de crisi no tien a veyer con ista notable reducción economica, soque lo consideran un “acto intencionau” d’o gubierno aragonés ta trancar o Consello. Manimenos l’Instituto Aragonés d’a Choventut (IAJ) “nomás” ha sufriu un 18% de reducción presupuestaria. Seguntes Héctor Saz, president d’o CJA, a grau reducción economica “nomás se puede entender como un castigo a la independencia d’a nuestra entidat frent a la linia politica d’o gubierno autonomico”.

Fa dos meses se reunioron con a presidenta aragonesa, Luisa F. Rudi, que se comprometió a mediar ta que continase l’asignación presupuestaria. Héctor Saz considera a Rudi a zaguera responsable d’a fin d’o CJA y d’as suyas iniciativas y actividatz de participación y asociacionismo chovenil en Aragón.

O CJA exiche que se guarancie a suya continuidat meyant a modificación d’a partida presupuestaria. Asinas mesmo, no descartan planteyar midas reivindicativas como movilizacions, demanda de responsabilidatz politicas u mesmo acudir t’os tribunals de chusticia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.