O Consello de l’Augua apreba o Plan Hidrolochico de l’Ebro

Ahiere estió aprebau o nuevo Plan Hidrolochico de l'Ebro con a oposición de Catalunya, asociacions ecolochistas y CHA

Valle_del_Ebro

Confederación Hidrografica de l’Ebro. Imachen: Wikipedia

Ahiere s’aprebó o Plan Hidrolochico de l’Ebro (PHE) por parte d’o Consello de l’Augua de l’Ebro en una sesión rapeda de nomás tres horas. D’os 98 representants en l’organismo, 74 votoron a favor (todas as comunidatz autonomas fueras de Catalunya, regants y municipios), 9 en contra (CHA, Catalunya y asociacions ecolochistas) y 5 abstencions (IU, interpresas hidroelectricas y sindicatos). Xavier de Pedro, president d’a Confederación Hidrografica de l’Ebro (CHE), se felicitó por “l’amplo consenso” que meteba fin a anyos d’atraso en l’aprebación d’o Plan. O PHE pasará a o Comité d’Autoridatz Competents y s’aprebará de forma definitiva por o Ministerio d’Agricultura.

O nuevo PHE reconoixe reservas de cabals pa siet territorios: 40 hm. cubicos anyals pa Castiella y Lión, 21,75 pa Alaba, 148,75 pa A Riocha, 32 pa Nabarra, uno pa Castiella-La Mancha, 445 pa Catalunya y 850 pa Aragón. Istas reservas, una vegada siga en vigor o PHE, tendrán a finalidat de “cubrir as necesidatz de regadío, enercheticas, industrials y de suministro a la población seguntes a disponibilidat d’o recurso en base a las obras de regulación existents u previstas en iste Plan Hidrolochico”.

Asinas mesmo, o PHE, en a teoría, faculta a o Gubierno d’Aragón de vetar trescoles dando-le dreitos d’intervención mesmo dende Mequinenza. Manimenos, en a practica, se dubda de que bell tribunal convalidase dita intervención. Os recursos hidricos d’o PHE empacharían de fer trescoles, pero a lechislación espanyola sí permitiría a venda de dreitos hidraulicos entre diferents cuencas.

Por contra, CHA, o Gubierno de Catalunya y as asociacions ecolochistas como Coagret, a Plataforma en Defensa de l’Ebre u a Plataforma Cuenca Azul, expresoron o suyo refuse a iste nuevo PHE. Coagret considera que “ye una oportunidat perdida pa adaptar a chestión convencional d’explotación de recursos hidricos a las nuevas necesidatz ambientals que exiche a sociedat d’o sieglo XXI y que ampara a Directiva Marco de l’Agua europea”. Comentan tamién que iste nuevo Plan “alenta a ‘hidroesquizofrenia’ por l’ixample d’o regadío y a usura por as concesions de l’augua propias de prencipios d’o sieglo XX, quan as realidatz socioeconomicas y ambientals mica teneban a viyer con a situación actual.

Critican dende ista asociación que no se siguen as directrices d’a Directiva Europea Marco de l’Augua, considerando que se ye fendo una “bombolla de l’augua similar a la que viviemos en a construcción y infraestructuras”. Denuncian que “o verdadero obchectivo real d’iste Plan ye o maximo control d’os recursos hidricos, con una demanda agraria de 10.800 hm. cubicos/anyo d’os 13.900 de media d’os recursos naturals de l’Ebro” o que “continará degradando os ecosistemas aquaticos tanto por a falta de cabals circulants como por a contaminación difusa asociada” criticando l’ilegal entibo de Mularroya, o recreiximiento de Yesa u o nuevo entibo prochectau en Auguaviva.

O Gubierno catalán s’amuestra contrario a iste PHE, considerando que mete en risque o delta de l’Ebro en meter o cabal ecolochico en minimos. O representant catalán consideró que o PHE s’ha aprebau “sin o consenso politico territorial y social“.

Dende CHA, alertan que no se cumplen os obchectivos medioambientals pa 2015 que permitirían d’alcanzar os d’a Directiva Europea Marco de l’Augua, criticando que nomás “se busca solucions en obras faraonicas“, que “se procede a la privatización factica d’os ríos” y que “tampoco no se procede a la modernización de regadíos”.

Tanimientres, IU s’ha absteniu pa “no atrasar o escomencipie d’o Plan parando cuenta en l’atraso que leva” y que fa dificil que se pueda arribar en os obchectivos ambientals de 2015. Tamién amuestran preocupación por o presupuesto d’o Plan, que cuenta con dificultatz. Dandalian sobre l’ixample de 800.000 hectarias de cultivo y as suyas obras y consideran que as cifras d’o PHE “son dubdosas” y que “istas obras no encaixan con as proposas d’a Nueva Cultura de l’Augua“.

O PHE aprebau supondrá una inversión de 600 millons d’euros y a creyación de 18.000 puestos de treballo anyals dica 2015.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.